Bureau Rampenbestrijding a cambia su nomber pa ‘Crisis Management Office Aruba’

Nan a bira awor Oficina CMO

ORANJESTAD (AAN): Mundo ta cambiando y Bureau Rampenbestrijding Aruba (BRA) no por keda atras y ta cambia su nomber pa Crisis Management Office (CMO). Rino Hermans, director di CMO, ta splica cu den prome instante e nomber mes tabata bisa kico ta su tarea: BRA tabata enfoca riba e momento cu un calamidad presenta y con pa prepara e hendenan pa atende cu desaster.

   Na 2014 Nacionnan Uni a proclama cu mester cambia e maneho di desaster pa maneho di riesgo pero BRA y Aruba, como mayoria pais di mundo, no tabata cla pa haci e cambio aki. Mientrastanto cu BRA a dedica pa haci tur e cambionan y structura full Aruba, BRA a prepara tur e plannan y djey a pasa pa e parti di digitalisacion. Pero 2020 tabata un di e añanan cu a pone un brake riba e desaroyo pa BRA bay di un instancia cu ta deal cu desaster pa un instancia cu ta midi risiconan.

   Plan di seguridad ta un garantia: Rino Hermans a duna algun ehempel pa ilustra e diferencia. Un ehempel ta cu na Aruba gusta traha casnan den rooi y despues ora awa yobe, ta yama y keha cu e cas a inunda. Awo ta den un fase transitorio, pero den futuro esaki no lo por tuma lugar mas.

   Otro ehempel ta na momento cu na Aruba tin un concierto di 10 mil hende y no tin un plan di seguridad of Carnaval cu 60 mil hende y no tin un plan di seguridad. E structura nobo di CMO lo dun’e pueblo di Aruba un garantia cu no ta bay tin actividadnan mas, segun nan clasificacion, sin tin un plan di seguridad en caso algo sosode.

   Zelfredzaam: Nos tur ta responsabel: Na e momentonan aki ta bezig cu e ‘Early Warning’ y otro aña e ‘Early Warning’ hunto cu e website y conhuntamente cu e otro partnernan den risico, lo cuminsa haya noticianan mas adelanta. Otro desaroyo ta cu CMO ta cambiando e maneho unda cu gobierno ta carga tur e responsabilidad y e pueblo no. Awo ta bay cambia esaki pa ‘zelfredzaamheid’ y ya caba hopi scol y departamento ta hayando nan plan di seguridad y ta calcula cu pa 2025 – 2030 Aruba lo ta un di e paisnan mas desaroya den un pais completamente resiliente.

   Carnaval 70 ta den porta y e pregunta ta con CMO lo bay implementa su prome salida cu un evento di magnitud enorme cu lo ta e comienso di e aña aki. CMO ta den den dialogo cu Cuerpo Policial cu lo mester bin cu un plan di seguridad pa eventonan publico di e magnitud di e celebracion di otro aña. Pues lo cuminsa ripara cu den futuro, ora tur cos keda vastgelegd, cu hendenan na Aruba lo no por organiza eventonan mas sin un plan di seguridad ingediend y aproba. Esaki ta pa scapa bida di hende y si un incidente sosode, nos mester por ta capaz pa deal cu esaki y deal cu e consecuencianan tambe. Pero si bo ta prepara, bo sa pecies con pa atende cu esaki, segun Rino Hermans.

   E leynan na Aruba ta poco anticua y CMO tambe tin su leynan. E pregunta ta si tin plan pa structura y cambia esakinan conhuntamente cu e cambio di BRA pa CMO. Rino Hermans a trece dilanti cu CMO ta consciente di esaki y awor cu e website nobo, mester bay adapta esaki na e ‘Early Warning’ tambe y CMO tin e proposicionnan pa e verordeningen cu mester worde cambia. E calamiteitenverordening mes ta di 1996 y awo nos ta na 2023. E ley ey ta mas pa desaster natural y no pa risico ni cambionan climatico. Pero CMO a entrega un proposicion cu awor lo mester cana su caminda y huristanan lo mester traha riba esaki cual lo tuma su dianan pero semper por cambia un maneho tambe via di Conseho di Ministro unda cu por pone cu e ley por cambia entrante e dia ey y ta tene cuenta cu seguridad di full e pueblo y estado.

   Aruba ta prome na mundo cu e structura aki: Curacao tin su maneho di riesgo caba pero Aruba ta e prome na mundo cu tin su propio logistica, su propio mantenimento, su propio desaroyo y propio digitalisacion. Den e constelacion aki Aruba ta e unico na mundo. Na otro partinan di mundo e paisnan cada un tin un parti cu nan ta atende cune, pero Aruba ta e unico caminda cu nos ta centralisa tur e meetingroomnan, e maneho, e mantenimento y e parti logistica pa dun’e pueblo e sosten den momentonan dificil.