ORANJESTAD (AAN): Diadomingo marduga pa 3:00 am, holoshinan na Hulanda a wordo hala un ora atras debi cu tempo di winter a yega.
Debi na esey, awor e diferencia di horario entre Aruba y Hulanda a bira awor 5 ora envez di 6 ora.
Na Hulanda, holoshi ta wordo manda tur comienso di aña riba e ultimo Diadomingo di Maart cu 1 ora dilanti (‘zomertijd’). Y cada final di aña riba e ultimo Diadomingo di October, e ta bay 1 ora atras (‘wintertijd’).
Realidad ta cu mester por papia solamente di ‘zomertijd’. Pasobra ‘wintertijd’ di berad ta e tempo normal, y ta den zomer ta agrega un ora acerca. Un dia e ora ta dura na Hulanda un ora mas largo.
E asina yama zomertijd a wordo introduci debi cu e oranan cu tin luz den verano, lo bay cuadra mihor cu e horarionan cu hende ta spierta y lanta. Di e forma ey lo por bay spaar coriente tambe, debi cu anochi ta keda cla pa un ora largo mas. Pero awor tin investigacionnan nobo cu esaki ya casi no ta yudando cu spaarmento di coriente.
Tin hasta oponentenan cu no kier pa bin cu zomertijd mas, y djis keda henter aña cu e tempo normal. Pasobra hopi hende ta bisa cu fisicamente nan tin molester di bay cambia holoshi, pasobra e lo ta strobando e holoshi biologico.
