ORANJESTAD (AAN) – Presidente di Parlamento mr. Edgard Vrolijk, a declara durante e reunion Tripartiet na Sint Maarten,
cu Aruba ta haciendo lo corecto, cumpliendo cu e presupuesto na tempo, y na orden, y cu e normanan di Landspakket, y asina mes a haya un strafrente di 6.9%.
A fia placa, a base di articulo 36 di statuto pa maneha un crisis mundial causa pa un pandemia y cu Aruba tin cu paga bek loke nan sa esey, pero haci negoshi na lomba di esnan afecta door di e crisis, ta un abuso!
“Mi ta kere cu nos tur akiden, den e sala aki, den un of otro manera, tin e mesun sentimento aki. Historia di presente ta mustra nos cu lo tin disputa, y mi ta kere cu a yega momento pa nos keda cla cu e concepto di ley di Geschillenregeling, pasobra segun mi persona nos tin un disputa caba encuanto articulo 36 di Statuto di Reino, unda cu pa nos ta hopi importante como pais, pa sa si enberdad articulo 36 ta duna Hulanda e autoridad, di por impone straf-rente riba un ayudo pidi den necesidad. Cu nos tin cu paga bek 916 miyon florin, como pais Aruba, cu interes nos ta conciente, pero malusa e articulo 36 di statuto pa aplica strafrente di 6.9%, a base di un mocion cu Tweede Kamer a sconde tras di e dicho cu ta pa e pagado di belasting Hulandes, esey no ta hustificabel.
Terminando, un biaha mas mi ta haci apelacion na Sint Maarten y Curacao cu awe mas cu nunca nos keda uni, pero pa tur cos den union. Pasobra nos conoce nos pasado, nos conoce nos situacion di presente, nos ta compronde nos hendenan y nan necesidadnan.
Tripartite por ta e suela pa nos logra e mehoracion, proteccion y mehoracion di nos democracia y nos derechonan fundamental cu nos kier mira realiza y respeta den Reino Hulandes”! Presidente di Parlamento, Edgard Vrolijk a conclui.
