Bureau City Inspector no ta para responsabel pa sushi ariba tereno priva

Maikel Gomes, Vocero:

*Propiedad na Rooi Bosal a bira un molester pa e habitantenan 

ORANJESTAD (AAN):   Vocero di Bureau City Inspector, Maikel Gomes, a duna di conoce cu nan a haya un melding indicando cu na Rooi Bosal 70, e bisiñanan ta sinti algun molester relaciona cu un propiedad na e adres.

            Gomes a indica cu ta trata di un trailer para ariba e tereno aki cu pianan di cement y esey no por tampoco.

            A bay check e caso aki cu DIP ya cu DIP tin cu duna cuenta di e caso aki. E bisiñanan a laga sa cu nan tin molester di bestia, paloma, sushi. E propiedad ta bandona pa basta tempo y esey no por tampoco, el a remarca.

            Bureau City Inspector no ta para responsabel pa sushi ariba tereno priva, el a agrega.

            Esun prome yama den e caso aki ta e doño di e tereno of di e cas. E doño ta responsabel di loke tin ariba dje.

            Den e caso aki e doño tin cu desmantela e trailer y ta asumi cu DIP lo mester cay aden, door cu no ta un cas. DIP lo tin cu duna ordo pa kit'e.

            Tin un pensamento eroneo den pueblo cu tur ora tin cu yama BCI pa resolve casonan asina. Pero e no ta asina. "Anos ta resolve tur problema di sushi ariba tereno di gobierno", Gomes a enfatisa.

            El a haci un apelacion na e doño di e tereno na Rooi Bosal 70 pa haci su tereno limpi pa evita cu e bisiñanan tin molester di esaki.