Bunita Santo Sacrificionan di Misa den nos Misanan Catolico pa celebra Dia di Mama

ORANJESTAD (AAN) – Diadomingo 9 di Mei, pueblo Catolico por a participa di Santo Sacrificio di Misa, dedica na Dia di Mama, wardando tur protocol di DVG, na nos Misanan rond di Aruba.

E Padernan den nan predicashi a destaca e rol di un mama, su importancia, su esfuerzo y sacrificio contal cu nan yiunan lanta bon, studia, y yega na un profesion. Na prome lugar a pone Mama Maria como ehemplo di un mama entrega na su Yiu y cu a pasa den momentonan di alegria ora Jesus a nace, y den sufrimento indescriptible ora El a wordo crucifica.

Y na mundo y sigur aki na Aruba, unda e Sacerdotenan a mustra tur yiu riba e respet y amor cu nan mester tin pa nan mayornan, y vooral nan mama ya cu tin hopi mama cu pa un of otro motibo, ta nan so tin pa lanta nan yiu, y no ta facil. Amor y respet, obediencia, y esfuerzo propio ta e regalo di mas grandi y valioso cu un mama por ricibi.

Diadomingo, riba Dia di Mama, tabata hopi special despues cu aña pasa no tabata tin Misa cu presencia di feligres pero solamente virtual. E aña aki si, afortunadamente, nos mamanan por a sinti contento, hopi di nan acompaña pa nan famia (no obstante distanciamento fisico) di un bunita Santo Sacrificio di Misa, den nos diferente distritonan, y mas grandi di tur cos ta cu riba e Dia di Mama aki, nan por a ricibi Santo Comunion for di man di Pastor.

Por observa hunto cu e articulo aki, potretnan di e Santo Misa na Pro-Catedral.