Bunita ceremonia di ‘graduacion’ di Scol Preparatorio Tarcisius

ORANJESTAD (AAN): Recientemente Scol Preparatorio Tarcisius na Brazil a tene su graduacion 2025.

Un grupo di mas cu 36 alumno a subi e escenario di Centro Parokial di misa di Brazil pa ricibi nan certificado di a termina scol preparatorio y ta cla pa bay scol basico.

   Despues cu himno di Aruba tabata presenta, pastoor Andry Soto a habri e atardi cu un oracion di bendicion. E maestro di ceremonia tabata meneer Addonsito Croes.

   Tabata juffrouwnan Norinne y Gisela cu a guia e anochi presentando hunto cu nan klasnan baile y canto cu nan a siña e muchanan. E team di docente merece tambe un elogio pa e trabao eficiente cu nan a haci.

   Tambe a tuma despedida oficial di juffrouw Angela Romero kende pa varios aña a ocupa e puesto di cabesante di Scol Preparatorio Tarcisius. Juffrouw Angela den su speech a gradici tur mayor y a encurasha e graduadonan pa nan semper keda bon mucha cordando cada balor cu Tarcisius a inculca den nan.