Un desaroyo hopi interesante na Aruba:
ORANJESTAD (AAN) – Esaki sigur ta un trend mundial ya cu awendia e hendenan muher no kier keda stagna un caminda, pero nan kier sigui avanza y ta hacie tambe, y na Aruba no ta e diferencia.
Awendia, por mira con hopi dama cu tin un trayectoria profesional caba, ta sigui inverti den nan desaroyo personal y intelectual. Varios curso y tayer di trabao di diferente tema ta wordo duna, sea door di profesionalnan local como internacional cu ta bin Aruba y cu ta hendenan acredita pa otorga un diploma na e participantenan.
Bunita ta cu e esfuerzo ta personal, kiermen nada cu ta wordo paga pa door di trabao mes, ni gobierno, ni otro instancia, pero cu ta enrikece e dama cu hasta loke ta adkiri den extra conocemento, ta un balor agrega na su mes trabao, y prepare pa en caso cu despues e kier lanta su propio compania, sea como counselor, of otro.
Ta bon pa destaca cu financieramente esaki ta nifica un esfuerzo grandi, pero cu tin fruto pa cosecha tambe. E damanan aki den su mayoria ta mama cu responsabilidad cu yiunan cu ainda ta bayendo scol, y cu nan kier ta un bon ehemplo di superacion, esaki fuera di ta ama di cas, y den hopi caso unico proveedor di e famia tambe. Nan merece un fuerte aplauso. Hendenan muher balente y empodera cu ta genera admiracion y orguyo.
Aworaki mes, tin un par di dama cu a realiza algun curso y tayer di trabao interesante, cu ta biahando pa Colombia pa participa den un Congreso di un siman, cu fabor di Dios. Matutino DIARIO ta hopi interesa pa haci un par di entrevista, ora nan bin bek.
