Bucuti y Tara orguyoso di a haci donacion di un tereno grandi na Noord

Cu evento simbolico di plantamento di mata

ORANJESTAD (AAN): “Cuido di naturaleza, ta yuda cuida mente,” esaki mes tabata e pensamento cu Bucuti & Tara Beach Resort a aplica ora nan tabata tin e honor di invita Respaldo, e Fundashon Arubano pa Salud Mental, na The Bucuti & Tara - GMC Nature Preserve pa reconoce Dia Mundial di Salud Mental 2023.

   E evento a tuma lugar recientemente na e santuario natural situa den e area di Noord unda empleadonan di Respaldo hunto cu empleadonan di institucionan di salud enfoca riba salud mental y universidadnan local a uni hunto pa un plantamento di mata special como parti di e programa di reforestacion extensivo di e parke nobo.

   E Federacion Mundial pa Salud Mental ta e fundador di Dia Mundial di Salud Mental. E Organizacion Mundial di Salud, cu ta reconoci universalmente, ta yuda anima Dia Mundial di Salud Mental cada aña. E dia ta un oportunidad pa hende y comunidadnan uni. E tema di e aña aki ta "Salud mental ta un derecho humano universal" pa mehora conocemento, aumenta conciencia y promove accionnan cu ta promove y proteha salud mental di tur hende como un derecho humano universal.

   Pa e reconosemento di e aña aki, Respaldo kier a simboliza e importancia di naturaleza y salud mental. Tambe nan kier a comparti cu e salud mental di cada persona ta manera un mata cu mester di cuido continuo. E grupo a planta 100 mata. Bushicuri, Druif, Palisia dushi, y Zjiron tabata algun di e 30 especienan indigena cu a worde planta.

   E esfuerso di Respaldo a bira posibel pa medio di colaboracion di e resort, The Bucuti & Tara - GMC Nature Preserve, den brindamento di espacio, Ban Lanta y Planta pa suministro di e matanan y e apoyo di gobierno di Aruba. Ademas di suministrae matanan, Ban Lanta y Planta tabata crucial den preparacion di e plantanan chikito y espacio den e reserva prome y despues di e actividad, y a yuda cu e sabiduria pa planta e matanan correctamente pa asina asegura nan sobrevivencia considerando e clima di Aruba.

   The Bucuti & Tara - GMC Nature Preserve ta celebra su prome aniversario

Na Oktober 2022, Bucuti & Tara a celebra nan di 35 aniversario door di regala su isla 120.000 m2 di tereno eigendom na Noord cu lo worde proteha y preserva pa semper den The Bucuti & Tara - GMC Nature Preserve. E resort a compromete pa reforesta e area cu 15,000 mata indigena. Durante e di 36 aniversario di e resort riba 19 di October, te cu awe, 719 mata a worde planta y mas cu 1,000 plantula ta worde prepara door di Ban Lanta y Planta den e cas di kweek di e preserva.

   E preserva ta proteha flora y fauna y eventualmente lo añadi padnan natural pa residentenan y bishitantenan por disfruta di e beyesa natural di e isla. E esfuersonan di sostenibilidad di e resort ta inclui sosteniendo su comunidad y brindando espacio pa actividatnan manera e plantamento simbolico di mata. Adicionalmente, The Bucuti & Tara - GMC Nature Preserve ta sirbi como un zink di carbono, extrayendo emisionnan di CO₂ for di e atmosfera y devolviendo oxigeno fresco.