Marco Christiaans como invitado na Expo na ANA:
ORANJESTAD (AAN)—Señor Marco Christiaans, den entrevista cu DIARIO, a elabora tocante e Expo cu a tuma lugar den Archivo Nacional Aruba, enfocando riba e dificultadnan cu piscadornan local ta pasando aden, y cu ta stroba nan trabao di pisca pa sostene nan famianan.
El a bisa cu el a keda sorprendi di a wordo invita, pa duna su comentario encuanto piscamento. El a conta cu el a skirbi un buki titula Perseverancia, den cual el a relata hopi di loke ta sosode, principalmente, bao di e piscadornan na Noord y otro lugarnan di lama, y e doñonan di boto y rednan na Noord, tiramento di reda, etc.
El acepta e invitacion cu hopi gusto, y el a haya cooperacion cu algun amigo pa trece algun articulo cu tin di haber cu piscamento. El a corda tempo cu e tabata mucha cu e mes a traha reda na cas, pasobra su tata tambe tabata forma parti di un compania di reda, y a relata tocante e proceso aki. Di jong e tabata bay afo trek pisca y tambe a pisca. Pero awo si e tin un par di aña cu e no a subi lama, mas.
El a comenta cu e no sa si su buki ta valido mas, pero tin un par di ley di piscamento den dje cu ta data di aña 1951, unda ta splica ki materialnan por uza pa pisca. Aworaki e ta tende den noticia hopi keho, y malcontento. “Pero pa mi ta sincero nunca mi no a profundiza mi mes pa bay mira kico, berdaderamente, ta e motibonan.
El a bisa cu na Aruba hende ta kere cu nos tin hopi lama, pero gran parti di lama ta den teritorio di Venezuela, y Aruba su espacio pa pisca ta hopi limita. Anto si bin cu barconan grandi, lastrero, cu ta lastra den nos awanan teritorial, na dado momento nada mas nos piscadornan mes no ta haya nada mas. “Esaki si mi ta condena di profundo di mi curazon pasobra e ta stroba nos mesun hendenan pa pisca, y e ta un parti pa cria nan famianan tambe. Nan ta stroba nos hendenan piscado cu nan trabao, anto ora cu nan bay lama no tin nada pasobra nan a pasa cu redanan grandi cu tur sorto di cos anto ‘stof zuiger’ tur nos lama”, señor Christiaans a remarca, reiterando cu e ta condena esaki severamente.
{gallery}Awendia e piscadornan local ta wordo hopi stroba pa pisca, locual e ta condena profundamente{/gallery}
