Bruela di macaco: algun dato importante pa sa

ORANJESTAD (AAN):  Parce cu ademas di Covid-19 mundo henter ta preocupa cu e aparicion di e asina yama 'bruela di macaco', 'mokeypox'  of 'apenpokken'.

E malesa aki ta wordo registra den varios pais unda diferente caso a aparece. Segun informacion recien, tin mas cu 90 caso confirma den alomenos 14 pais unda normalmente no lo a spera cu e malesa aki lo a aparece.

Di locual e expertonan si ta adverti ta cu no ta trata di otro pandemia di Covid-19 y cu no mundo no ta cerca di bay bek na e 'lockdowns' pa contene e propagacion di 'bruela di macaco'.

Sinembargo, esaki ta un brote no usual y sin precedentenan cu a sorpresa e cientificonan cu ta specialisa den e malesa y semper ta un preocupacion ora c'un virus ta cambia su comportacion.

E bruela di macaco tabata hopi predecibel. E hogar natural di e virus ta e bestianan salvahe, y den realidad ta pensa cu ta e 'roedornan' (rodents) y no e macaconan esnan cu ta transmitiendo e malesa.

Ora c'un persona den un selva tropical di Africa Occidental y central ta bay den contacto c'un criatura infecta, e virus ta bula entre e especienan. Su cuero ta bay den un erupcion, cu ta forma un blar y despues ta bira casca.

E virus aworaki ta pafo di su habitat natural y ta esforsa den propaga, pa locual mester un contacto cercano prolonga pa su reproduccion. Pesey, e brotenan tin e tendencia na ta chikito y disparce riba nan mes.

Un cantidad reduci di casonan a surgi antes den otro partinan di mundo, pero tur lo por ta relaciona inmediatamente c'un hende cu lo a viaha na un pais afecta y a trece te na su cas.

Esaki ya no ta e caso mas:

- Pa prome biaha, e virus ta den personanan sin un conexion specifico cu Africa occidental of central.

- No tin claridad for di ken e hendenan ta contagia.

- Bruela di macaco ta propagando durante actividadnan sexual y mayoria di e casonan tin lesionnan den e genitalnan y den areanan cercano.

- Hopi di esnan afecta ta hobennan gay y bisexual.

E expertonan ta remarca cu esaki no ta Covid-19, pero mester actua pa evita cu e virus ta haya forsa, y esaki ta algo cu realmente kier evita. Esaki ta e mayor brote di bruela di macaco hamas mira na Europa.

E cientificonan sa cu e brote aki ta diferente, pero nan no sa pakico.

Tin dos teoria: e virus a cambia of e mesun virus antiguo a haya su mes den e lugar corecto na e momento corecto pa prospera.

Bruela di macaco ta wordo contagia door di un virus di DNA, pa locual no ta haci mutacion lihe manera Covid of griep. Un analisis genetico anterior ta sugeri cu e casonan actual ta hopi relaciona cu e formanan di e virus observa na 2018 y 2019.

Ta hopi pronto pa ta sigur, pero no tin evidencia cu ta trata di un variante mutante nobo.

Pero, un virus no tin cu cambia pa probecha e oportunidad, manera e observa den e brotenan grandi inespera di e virus di ebola y zika den e ultimo decada.

Parce cu e vacunacion masivo contra bruela den pasado lo por brinda na e generacionnan mayor proteccion contra e bruela di macaco, estrechamente relaciona.

Na diferencia di Covid-19, esaki ta un virus conoci, no ta uno nobo, y ya caba tin vacunanan y tratamentonan. Den mayoria di caso ta pasa como un malesa leve, aunke por ta mas peligroso den muchanan chikito, hende muher na estado y personanan cu sistemanan inmunologico debil.

Pero ta propaga mas poco cu Covid-19, pero e rash caracteristico y doloroso ta haci cu por bira mas dificil tume como algo sin importancia manera un tos. Esaki ta facilita e trabao di haya e personanan cu por ta contagia y vacuna esnan cu ta core risico.

E expertonan a adverti cu awor cu zommer tey y cu tin mas reunionnan masivo, festivalnan y fiestanan, cu e propagacion por wordo acelera. 

SINTOMANAN:

- fiebre

- dolor di cabes

- dolor muscular

- dolor di lomba

- calafrio

- agotamento

- ganglionan linfatico hincha 

Na un inicio, e sintomanan di e malesa por ta parecido na griep. E sintoma mas comun ta aparece di 1 na 5 dia despues di e fiebre. Ta desaroya un erupcion cu normalmente ta aparece riba cara y despues ta extende na otro partinan di e curpa, principalmente man y pia.

Den hopi caso actual, personanan a raporta aparicion di e rash den e zona genital.

Un persona cu ta presenta e sintomanan aki cu aparicion di rash asina mester bay docter di cas y isola su mes pa evita contagionan.