ORANJESTAD (AAN): Recientemente Super Food Plaza Cares Program a haci entrega di un check na valor di Afl. 25.000 na Heart-Centered Leadership Foundation (HCLF).
E check a ser entrega pa financial manager di Super Food Plaza, Sr. Erick Kelly y a keda ricibi pa Sra. Keyla Rojas y Micheline Rojer-de Kort di HCLF.
Ta gradici e clientenan di Super Food di curazon pa nan donacion. Heart-Centered Leadership Foundation a ser funda na 2008, cu e meta pa desaroya un character positivo den nos hobennan door di fortalece nan amor propio y integridad. HCLF ta haci esaki dunando sosten na scolnan, organizacionnan pa hoben, maestronan, profesionalnan ariba tereno social y mayornan.
Nan ta duna nan e hermentnan necesario pa por duna un mihor guia na e hobennan pa nan alcanza un futuro positivo, saludable y exitoso. HCLF ta logra esaki tambe door di envolvi e hobennan directamente, yudando nan descubri nan mesun potencial y con nan por desaroya nan bida di un manera positivo. Ta importante pa nos inverti den nos hubentud, cu ta pasando den hopi problema, y cu ta nos futuro di mañan.
E ganadornan di luna di april den e campaña Give & Win di e Super Food Plaza Cares Program a resulta:
- Ronald Dijkhoff – gift card Afl. 1.000
- Georgina Vrolijk – gift card Afl. 750
- Rita Ras – gift card Afl. 500
- Pascale Ustar – gift card Afl. 250
- Monrick Croes – gift card Afl. 100
Pa participa den e campaña aki, simplemente haci un donacion di Afl. 1.75 of mas na cualkier caha di Super Food Plaza y deposita bo recibo original cu nomber y number di telefoon ariba dje den e tombola. Tur prome dia di luna ta saca 5 feliz ganador. Premionan ta patrocina pa Super Food y tur donacion ricibi ta bai bek pa 100% na comunidad. Fondonan di SFPCP ta ser maneha pa CEDE Aruba.
