Boto cu posiblemente 9 curpa den estado avanza di descomposicion haya ta drif panort di e isla

ORANJESTAD (AAN): Manera cu DIARIO a indica ultimo simannan, tanto autoridadnan di Caribe Hulandes, como tambe Mericano tin un extra vigilancia e dianan aki riba Lama Caribe. 

Esey ta bin debi cu diripiente a detecta un ‘piek’ den e cantidad di transporte di contrabanda di un pais pa otro, principalmente narcotica.

   Pesey constantemente tin avion ta bulando riba Caribe, equipa cu sistemanan cu por detecta movimento sospechoso riba lama.

   Riba Diadomingo 16 di Mei 2021 den oranan di atardi, e avion Dash-8 cu ta un patruyero di Guardacosta di Caribe Hulandes, tabata bulando panort di Aruba y a detecta un boto ta drief.

   CURPA DI HENDE:

   Ta trata di un boto tipo peñero y visiblemente via nan sistema di camera a mira cu e no tin ningun tipo di Outboard Motor poni.  Pa nan sorpresa, e camera tabata detecta algun hende abordo cu no ta move, ni haci intento di hisa man ni nada.

   Nan a cuminza pensa cu e hendenan aki sea ta hopi malo of no ta na bida mas.

   A base di e informacion cu e tripulacion di e avion Dash-8 a manda pa e Centro di Rescate y Coordinacion (JRCC) di Guardacosta, a dirigi e cutter Panter di e punto di sosten na Aruba pa bay na e localidad di e boto, cu ta como 120 miya panort di e isla.

   LAMA HOPI BRUTO:

   Loke a haci e buskeda di e boto un reto ta e hecho cu e condicion di lama y tempo tabata basta malo.  Lama Caribe tabata bruto cu olanan masha halto mes tanto Diasabra como Diadomingo.

   Como cu tripulantenan di Panter tabatin dificultad pa haya e boto, Centro di Rescate y Coordinacion a bolbe dirigi e avion di patrulla Dash-8 pa asisti e cutter Panter den e buskeda.

   Asina pues e Cutter a logra yega na e boto cu tabata drief.  Pero debi cu lama ta asina bruto cu olanan fuerte, no por a baha oficialnan di Guardacosta riba e boto.

   Ya caba solo a baha, y toch den e scuridad nan a mira cu tin diferente curpa sin bida abordo, y cu nan ta ya den estado avansa di descomposicion.  A ser menciona cu a calcula cu tin 9 curpa, pero no a haya confirmacion debi cu finalmente no a logra yega cerca di nan.

   BOTO KEDA DRIF:

   E cutter Panter a haci diferente intento pa por logra lastra e boto, pero esaki no a logra debi cu e cabuya tabata kibra na caminda.  Esaki ta comprendible, como cu lama tabata bruto sin fin.  A bolbe mara cabuya y trata na tow e boto.  Pero e tempo malo aki a pone cu un dado momento e cabuya di tow a bolbe kibra y Panter a perde e boto for di den e scur di anochi.

   Despues di esaki no a logra detecta e boto mas tampoco.  Ni usando equipo di FLIR Infrared no ta posible, como cu abordo di e boto no tin ningun alma bibo, pues e aparato no ta detecta ‘calor’ riba e boto.

    Pues asina, te cu Diamars atardi ainda e boto lo ta drif algun caminda panort di Aruba, of kizas e lo a sink.  Guardacosta a saca un notificacion pa barconan riba laman tambe tin un ‘sharp lookout’ pa e boto cu ta sigui drif riba lama.

    Vocero di Guardacosta di Caribe Hulandes a splica, cu e organizacion aki hunto cu autoridadnan di Aruba y partnernan internacional a cuminsa un investigacion den e caso aki.

   E potret aki saca atardi cu camera potente abordo di e patruyero Dash-8, por mira e boto ta drif.  E curpanan ta mas abao den e boto.