ORANJESTAD (AAN):Diamars mainta CEO di ATA Ronella Croes a tene un rueda di prensa, pa duna un recapitulacion riba con turismo na Aruba ta bayendo.
“Den luna di April nos a mira un crecemento di 20% compara cu luna di Maart di e aña aki”.
Pa ta specifico nos a ricibi un total di 58.774 turista na luna di April.
Nos sa cu aña pasa na Juli nos a habri nos fronteranan pa diferente mercado turistico y si nos wak Juli 2020 te cu April di e aña aki, nos por conclui cu nos a ricibi un total di 310.000 bishitante desde reapertura di nos frontera, segun Croes.
El a sigui bisa cu e casonan di COVID-19 bao di nos bishitantenan a keda relativamente hopi abao desde cu a habri nos frontera pa turismo.
Segun e CEO, esaki ta debi entre otro na e hecho cu Aruba su maneho ta pa haci 100% di test bao di nos bishitantenan.
“Tambe recientemente cu introduccion di e vacuna na diferente pais, nos por mira cu e grado di vacunacion sigur ta hunga un rol den limita e ingreso di e virus”.
Pa nos informa nos mes mihor di esaki, ATA recientemente a lanza un encuesta bao di nos turistanan.
Esaki a permiti nos pa haya un mihor bista di e grado di vacunacion bao di e turistanan, segun Croes, kende a indica cu un total di 11.466 turista a completa e encuesta, mientras cu lo sigui conduci esaki.
Di e 11.466 turista tabata tin 54% cu ya caba a book nan vacacion pa Aruba.
Un total di 82% di e 54% a indica cu nan ta full vacuna.
Croes a bisa tambe cu 43% di e 11.466 turistanan cu a participa na e encuesta a duna di conoce cu nan ta planeando un vacacion pa Aruba.
Ta asina tambe cu 74% di e 43% menciona, a indica cu nan ta full vacuna caba.
“Bo por premira y anticipa cu ora cu e turistanan aki cu ta planeando nan vacacion berdaderamente realiza nan viahe, e grado di vacunacion lo ta mas halto”, segun e CEO di ATA, kende a indica cu e cifranan aki ta mustra con importante vacunacion ta pa nos recuperacion economico y turistico.
