Bon dia amantenan di e fabuloso mundo di Motorsport.

Speedworld cu boso amigo Hubert ‘Furai’ Tiel. 

   Awe Speedworld ta presenta un proyecto tata cu yiu, cu sigur ta algo masha bunita pa comparti. Ta trata aki di e proyecto cu nos amigo Frederick Koolman, conhuntamente cu su yiu a logra despues di 2 aña, 8 luna completa.

   E auto mes ta un Chevrolet Impala 1985. E style di autonan a sali na 1958 te cu 1985, despues a bolbe sali 1994.

   Debi cu e ta body grandi, e style di autonan aki a worde uza pa auto di Polis, Taxi y auto famia cu e tempo a sali cu un motor 4.4, 267.9 cubic inch cu 115 horsepower, pero esun ki awo tin un 350 small block aden, completamente restore.

   Pa duna e Impala un toke special, el a haya un bunita Gray metalic y su asientanan a worde fura pa Adju.

   Segun Frederick, e auto a worde completamente desambla, pa despues cambia tur loke no ta bon pa piesanan nobo y asina bo tin un auto di 37 aña bieu, pero cu tur loke un auto nobo por ofrece.

   Di parti Speedworld, nos ta manda palabra di pabien cu e bunita proyecto aki.