Bon Bini Festival ta bek den Fort Zoutman

ORANJESTAD (AAN) – Señor Renwick Heronimo, Curator di Museo Arubano, den entrevista cu DIARIO, a duna di conoce cu Bon Bini Festival, ta atrobe na Fort Zoutman.

Esaki a tuma lugar diamars 4 di October aki, anochi y Heronimo a comenta cu despues cu e Museo a pasa den un periodo hopi dificil, door di Covid-19, unda unda a perde gran parti di su fondonan, y mester a cera algun di e museonan, poco, poco nan ta bezig habriendo nan bek.

Fundacion Museo Arubano a logra habri e Museo di Industria, e Community Museum y aworaki a cuminza cu Bon Bini Festival. Intencion ta pa habri tur e museonan den e proximo lunanan, pero tur cos ta depende di e subsidio cu nan lo haya bek.

Renwick Heronimo a remarca cu Bon Bini Festival ta un di e actividadnan mas popular, y ta hopi e peticionnan cu el a haya pa trece bek, no solamente pa e hendenan local, pero tambe pa e bishitantenan.

“Pasobra e ta un celebracion folklorico, un celebracion di nos historia, di musica, cuminda y asina hopi cos bunita, cu ta wordo presenta na momento di Bon Bini Festival, cu nos a bin den un areglo cu ATA, Fundacion Museo Arubano y Gobierno mes pa nos por activa Bon Bini Festival bek”, Heronimo a duna di conoce.

E intencion na e momento aki, ta pa hacie dos biaha pa luna, pero posiblemente nos lo bay cuater biaha bek, esta tur siman, lo mas pronto posible, mirando e acogida cu e show tin atrobe.

“Nos a dicidi di inicia cu e mesun show cu nos a stop y for di prome momento cu nos a cuminza e show ta completamente yen. Bon Bini Festival semper ta riba Diamars. Pero e biaha aki, e proximo tres lunanan e lo ta dos biaha pa luna”, Renwick Heronimo a reitera.