Inspectie di IVA y Economische Zaken cu e batata cayente
ORANJESTAD (AAN): E siman aki, Aruba Dental Society a duna reaccion riba situacionnan na Aruba den mundo di Dentistanan y cu no ta canando corecto.
Asociacion ADS a bisa cu nan tin basta tempo caba ta purba di haya contesta riba diferente pregunta. Tin varios inkietud den nos sociedad di dentista na Aruba. P'e motibo aki ey nan no por keda sin publica lo siguiente.
Tin hopi iregularidad ta tumando luga den e departamentonan di DVG y Economische Zaken, cu lamentablemente no ta haya e atencion adecua. E Asociacion di Dentistanan a manda varios e-mails y a busca contacto, pero ainda no tin ningun contesta concreto. Na mes momento nan a informa IVA, pa motibo cu nos ta di opinion cu mester actua mas rapido posibel. Lamentablemente te cu dia di awe, e departamentonan menciona no a tuma ningun accion.
No ta hopi siman atras a cera e capitulo di e "orthodontist" Kawaiah. Pero keto bay tin otro permiso cu mester wordo kita na Aruba. Pa motibo cu e permiso di trabao no ta otorga den forma transparente, ni tampoco corecto.
ADS ta puntra con por ta posibel cu ainda no a kita e permiso di Meneer I. Croes di Technodent? Na aña 2019 Departamento di Salud Publico, DVG, a otorga I. Croes, un permiso pa por traha como `Denturist' na Aruba. Na 2020 ADS a pidi DVG y Inspectie di Aruba, IVA, pa un splicacion over di esaki, mirando cu nos leynan di LV 'Beroepen in de Gezondheidszorg', no ta reconoce un denturist como tal. Un denturist no ta mescos cu un tandprotheticus cu ta un nivel di estudio di HBO na Hulanda.
Te awe ADS no a ricibi ningun respuesta, ni splicacion tocante e tema aki di ningun di e dos departamentonan concerni, esta DVG y/of IVA.
E titulo di tandprotheticus ta un titulo protehi na Hulanda, e ta un estudio di HBO y e ta un estudio, unda un pashent cu no tin ningun diente mas, por acudi cerca e tandprotheticus pa nan por midi un plancha p'e, esaki sin cu e pashent mester bishita e dentista prome. Den tur otro caso, unda cu pashent ainda tin diente den boca, e lo mester bay cerca su dentista prome.
Aki na Aruba e procedura aki no ta conta, paso aki nos NO tin un tandprotheticus, ni ley unda esey ta regla, pues tur tratamento di plancha parcial of completo tin cu worde efectua door di un dentista. E estudio di Denturist na unda tecnico dental Croes a obtene su diploma, ta riba nivel di MBO y ta reconoci na solamente tres estado na Merca (Oregon, Washington y Maine). Aparte di esey, bo mester pasa dos examen obligatorio (State Board Exams), pa por haya un licencia pa practica prome cu por cuminsa traha como un denturist, den e estadonan menciona anteriormente.
Den e caso aki meneer Croes no a pasa e examen nan aki, algo cu e mes a bisa e directiva di ADS algun tempo atras. Esey kiermeen cu e NO tin licencia pa por traha mane denturist na Merca, Canada y tampoco na Aruba. Pa duna un ehempel mas concreto un denturist cu mag di traha den e estado nan menciona no mag y no por traha den por ehempel estado nan di New York of Florida etc.
Na Aruba e pashent cu ta segura via AZV ta bin na remarca pa cada 4 aña haya un protesis (plancha) completo of parcial nobo, cu un eigen bijdrage chikito pa e pashent. Esaki por solamente ora e pashent ta haci e peticion na AZV via su dentista.
ADS no por comprende con DVG por otorga un permiso (vestigingsvergunning) pa por traha como tandprotheticus, sin busca e informacion corecto.
- E estudio, Tandprotheticus y Denturist, ta dos nivel di educacion completamente diferente. Un ta nivel di HBO y e otro nivel di MBO.
- Con por ta cu DVG a asumi cu e titulo di tandprotheticus y denturist ta igual? Tandprotheticus ta un titulo protegi den ley di BIG di Hulanda.
- Con por ta cu DVG a duna e derecho pa traha sabiendo cu e no a haal su examennan (State Board Exams) pa por haya su licencia? Pa tur claridad, e no mag di traha ni na e pais unda el a haci e estudio riba nivel di MBO y ni na Canada, mane a worde poni riba su verstigingsvergunning.
- Den meneer Croes su permiso di establecimento ta worde insinua cu e profesion aki den termino corto lo mester worde incorpora den AruBig. Esaki no tabata ni ta e caso to dia di awe.
Pa tur claridad, meneer I. Croes no mag di traha plancha riba su mes, ni completo, ni parcial, ni flexibel y seguramente e no mag di traha den boca di pashent pa pone vulling, traha corona, brug, aparato pa roncamento, pega diamanta riba djente, djente di oro etc. Esakinan tur ta tratamento cu solamente un dentista gradua y registra por haci.
Ta hopi di lamenta cu cada biaha ta haya erornan den e departamento di DVG y no ta haci nada y ningun hende no ta tuma responsabilidad pa esaki. Y loke ta mas alarmante ainda: no ta coregi e erornan!
