ORANJESTAD (AAN): Aruba College Fair 2022 lo tuma lugar dia 4 y 5 di november na Renaissance Convention Center,
di 12or di merdia te cu 6or di atardi, y lo duna tur hende cu ta buscando di sigui un educacion mas halto, acceso na e collegesnan y universidadnan y scolnan vocacional di Europa, Merca, Canada, Latino America, Region Caribe y Aruba.
Esaki ta habri pa tur hende, sea bo ta un studiante di EPB, MAVO, HAVO of VWO buscando di sigui desaroya bo mes riba nivel di MBO, HBO, of WO; studiante di EPI buscando di sigui cu un educacion mas halto; studiante di UA cu ta desea di sigui nan estudio of transferi pa bay afor; y trahadornan cu ta buscando di eleva nan educacion na e siguiente nivel.
Nan ta ofreciendo te cu 2.000 tickets gratis pa e studiantenan actual; di lo contrario, e costo di preinscripcion ta cinco y diez Florin na porta. E evento aki ta un excelente recurso pa studiante, pa individuonan cu ta buscando di continua cu nan educacion pa papia directamente cu representantenan di institutonan y scucha oradornan riba tur dos dia cu presentacionnan riba diferente topico di estudio y guia pa un carera.
Por registra awor na www.ArubaCollegeFair.com. Djies klik riba e link “Pre-registration is now open” y yena e formulario online pa sigura cu lo bo ricibi tur e informacionnan necesario. Pre-inscripcion ta habri awor.
