Debi cu costo di bida a bira impagabel:
*Un suplica pa gobierno eherce control
ORANJESTAD (AAN) – For di prome cu BBO na frontera a drenta na vigor, dia 1 di Augustus, ya caba comunidad a cuminza sinti su efecto, pa mas cu gobierno y DIMP, declara cu no tin motibo pa aumenta e productonan di consumo diario, pues locual di custumber consumidornan ta busca den e diferente supermarketnan rond di Aruba.
Un dama a tuma contacto cu DIARIO, pa conta kico a primi su curazon y di varios otro cliente, cu ta cumpra den un negoshi cu tabata bon bishita pa su prijsnan mas abao cu den otro supermarketnan, y esaki ta ora nan a caba di haci compra, y na salida di e lugar a haya un señora cu, segun e mes a conta, ta biba di pensioen di AOV hunto cu su casa.
Nan ta pasando den preta caba pasobra mescos cu tur hende pa nan e prijs di awa y coriente a subi, y pa reduci gasto a suprimi uso di airco (nan a bende), y drumi den calor cu un ventilator.
Pero como dos hende grandi nan a purba di reduci menos posible nan gasto di alimentacion, pasobra con cu bay bin nan tin añanan ta cumpra den un negoshi bon conoci pa su prijsnan menos caro cu den otro establecimentonan.
E biaha aki, ah sorpresa! E señora a drenta den e supermarket cu su saco den man y a busca un garoshi, pero a ripara cu tin varios fruta y berdura cu no tin prijs, anto el a puntra y nan a bise cu nan no a caba di adapta prijs na “bbo na frontera”!
Ora nan a bise cuanto un saco di batata lo bira, mescos cu banana, y fruta manera apelsina y bacoba el a spanta. El a bay busca su carni mula, y a keda sorprendi cu e prijs nobo. Asina el a sigui wak cu hopi tristeza e prijs di azeta dushi, entre otronan, y tambe articulonan pa limpieza personal y di cas.
E semper ta haci su compra den tres parti, esta cada 10 dia, cu un presupuesto di 250 florin, tin biaha e ta pasa te 300, pero e bez aki e lo mester a a presupuesta alomenos 500 florin, loke e no tabata tin y unico cu el a cumpra ta koffie, sucu y pan. Ni beleg pasobra un paki di como seis slides di keshi a bira casi 8 florin y hasta e manteca a bira basta caro!
El a papia cu otro consumidor cu tabata saliendo di e negoshi, pasobra el a sinti cu mester saca afo su sentimento, pasobra e costo di bida na Aruba a bira ya impagable al menos pa hende cu ta biba di pension di biehez y sigur esnan di bijstand.
E dama cu a scuch'e, a yama redaccion y a pidi pa haci un yamada na gobierno pa haci control, pa laga hende civil drenta den e negoshinan wak prijs y puntra manera por constata bao capa di bbo na frontera, prijsnan ta subi sin mas!
