Boeing 787 di Avianca a haci aterizahe di emergencia na Aruba pa un pashent malo

E vuelo tabata di Madrid pa Bogota...

ORANJESTAD (AAN): Un emergencia medico a pone cu Diasabra anochi un avion grandi di Avianca bulando riba e ruta di Madrid (Spaña) non-stop pa Bogota (Colombia), a haye ta haci un desvio riba Lama Caribe pa haci aterizahe no-planea na Aruba.

   E avion a lanta vuelo pa 6:16 pm (ora di Spaña) for di e famoso Barajas Airport na Madrid.  E tabatin 8 ora y 12 minuut bulando caba e viahe transatlantico, ora cu emergencia a wordo declara.  Un pashent abordo a haya un atake di epilepsia, y esaki tabata uno di nan cu a bira basta grave.  Capitan lo por a bula e resto di 1 ora pico pa yega Bogota, pero no a riesga e bida di e pasahero.

   Pa exactamente 8:28 pm ora cu e tabata como 240 kilometer Noordoost di Curaçao, e capitan a pidi ATC di Curaçao pa dune vector, pasobra el a dicidi na bay haci un aterizahe di emergencia na Aruba pa un caso di urgencia medico.  E momento ey e avion tabata bulando 40.000 pia y faltando algo di poco mas di 1 ora y pico pa yega Bogota.

   Sinembargo como cu e ta un emergencia cu no por warda mucho debi cu e pashent ainda ta fo’i tino, mesora ATC Curaçao a duna Vuelo AV-11 ordo pa reduci altitud, y bira na su man drechi pa tuma rumbo direct pa Aruba.

   Mientras tanto na Aruba, e Groundhandler di Avianca a wordo notifica, y tambe via di Centro di Alarma, a percura pa busca Ambulans pa bin standby na Aruba, y e ta algo urgente como cu e avion lo yega kizas den menos di 30 minuut.  Esey ta exactamente loke a socede, esta cu a duna e avion un final approach mas cortico pa e yega tera mas rapido.

   Pa exactamente 8:58 pm, e Boeing 787-8 widebody di Avianca a ateriza, y a bay staciona na e Gate mas pariba di Terminal.  E pashent grave a wordo saca via e porta patras di e avion, pa bay direct cune den Ambulans.  Cu urgencia a bay cune Dr. Horacio Oduber Hospital, unda a dicidi pa e keda hospitaliza.  Pues e lo no por sigui cu e viahe.

   Mientras tanto, e avion a keda abao na Aruba un poco mas cu 1 ora y 20 minuut.

   Finalmente pa 10:18 pm e Boeing 787-8 di Avianca a lanta vuelo bek, y a bula direct pa Bogota na un altura di 40 mil pia, y despues di 1 ora y 20 minuut di vuelo, el a ateriza pa 10:38 pm (ora di Colombia).