Gobierno presente na apertura di oficina di trabao di Secrets Aruba

Secrets ta crea oportunidad di empleo specialmente pa esnan cu ta biba na San Nicolas

ORANJESTAD (AAN): Den fin di siman, Prome Minister Evelyn Wever-Croes tabata presente pa e apertura di e Recruitment Office di Secrets Aruba. E oficina aki ta situa na e edificio di Arubus San Nicolas. Akinan un ekipo local profesional lo atende tur esnan cu ta bin solicita pa e trabaonan cu Secrets ta ofrece.

   Secrets lo habri fin di 2024 y ta crea oportunidad di empleo specialmente pa esnan cu ta biba na San Nicolas. E cadena di hotel aki ta uno reconoci rond di mundo, y ta un tremendo oportunidad di empleo cu bon beneficionan pa e trahadonan.

   Prome Minister ta haci un invitacion na henter e comunidad pariba di brug pa pasa e recruitment center, busca informacion di e trabaonan cu Secrets ta ofrece y entrega un aplicacion pa asina abo tambe por forma parti di e hotel prestigioso aki.

   “Cu Secrets ta cuminsa un capitulo nobo pa San Nicolas. E desaroyo di San Nicolas ta locual lo hiba e desaroyo di Aruba na e siguiente nivel y lo nifica e diversificacion di e economia di Aruba. Mi ta haci un apelacion na e comunidad pariba di brug pa bin solicita. Aruba mester di bo labor na Secrets, e exito di e hotel aki ta bay depende di boso cu lo labora eynan. Mi deseo ta pa den algun luna ora e hotel habri nos por mira caranan di nos propio yiunan di tera laborando na Secrets.

  Mi palabra di gradicimento na Secrets pa pone nan confianza den Aruba den bon y den menos bon tempo. Mi ta desea Grupo Martinon, pero specialmente cada un persona cu ta bay traha na Secrets hopi exito”, Prome Minister a expresa.