Monton di vuelo atrasa a yega
ORANJESTAD (AAN): Vuelonan di diferente aerolinea Mericano, kendenan a keda ‘stagna’ na un otro ciudad of isla alternativo debi na e shutdown completo di Aeropuerto di Aruba e dia prome... tabata esnan cu a ateriza ya di trempan caba riba Diasabra.
E prome cu a yega for di Bonaire tabata pa 7:58 am, un Boeing 737-900 di United Airlines cu originalmente a bin for di Washington-Dulles International na Merca. E avion aki riba Diabierna, a keda circula rond di Aruba ora cu a bira conoci cu e no por baha debi cu Aeropuerto di Aruba a bira mes cayente manera un forno. Finalmente e ora nan a desvia pa Bonaire.
Despues di esey, for di San Juan (Puerto Rico) a yega pa 8:50 am, un Boeing 737-900 di Delta Airlines cu originalmente a bin for di Atlanta y cu ora nan tabata pasando Haiti a haya tende cu Aruba ta cera, y pesey a desvia y a bay ateriza na Puerto Rico.
For di San Juan (Puerto Rico) a yega tambe pa 8:56 am, un Airbus A320 di jetBlue cu originalmente a bin for di Newark, cu tabata pazuid di Republica Dominicana ora a haya sa cu Aruba ta cera. Nan a desvia y bay pa pasa anochi tambe na Puerto Rico.
Otro avion cu a bin di San Juan (Puerto Rico) y baha pa 9:22 am tabata un Boeing 737-900 di United Airlines cu originalmente a bin for di Houston. Nan a pasa anochi na e isla ey.
Pa 10:08 am, un jetBlue a yega for di San Juan. E ta un Airbus A320 cu originalmente a bin for di Boston, pero a desvia y pasa anochi na San Juan.
Pa 11:09 am un otro jetBlue a yega for di San Juan. Esaki ta un Airbus A321 cu originalmente a sali for di JFK Airport na New York. E tabata bulando banda di St. Kitts & Nevis ora cu e capitan a desvia y bay baha na San Juan. Pasaheronan a raporta cu nan a keda basta sinta den avion riba plataforma di Aeropuerto na Puerto Rico.
Un avion a bin di Curaçao y baha pa 11:11 am, y tabata un Boeing 737-800 di American Airlines cu originalmente a bin for di Charlotte. Nan a pasa anochi na Curaçao.
Pa 11:53 am un otro American Airlines a yega for di Curaçao. Esaki ta un Airbus A321 cu originalmente a bin di Philadelphia, y varios cien kilometer panort di Aruba, a desvia y a bay ateriza y pasa anochi na Curaçao.
Pa 12:05 pm un Airbus A330-300 widebody di KLM a yega for di Bonaire. Esaki originalmente tabata bulando for di Amsterdam direct pa Aruba, pero a desvia Diabierna anochi y a ateriza 9:15 pm na Bonaire.
Pa 12:17 pm un otro American Airlines a yega for di Curaçao. Esaki ta un Airbus A321 cu originalmente a bin for di Miami, y a djis bula over di Aruba y bay baha na Curaçao, unda a pasa anochi.
Y esakinan tabata djis “extra vuelo” ademas di e monton di avionnan cu normalmente ta baha y subi riba Diasabra na Aruba.
Aeropuerto di Aruba a pone tur hende na pia di trabao pa yuda den tur skina, pa atende pasaheronan cu ta yegando, y traha riba e rij di pasahero cu ta check-in y trata di haya bek cupo riba nan vuelo perdi di Diabierna, y esnan cu tin vuelo regular pa Diasabra.
Algun Aerolinea a keda basta stagna cu pasaheronan cu no por a haya asiento, y nan lo dura como 2 pa 3 dia pa “normaliza” bek e fluho di nan pasaheronan causa pa e delay aki.
