Boa gordo di 2.20 meter haya na un otro cas na Cashero

ORANJESTAD (AAN) Atrobe ta e temporada cu boanan ta activo, ya cu na varios lugar por a mira Boanan morto riba caminda y tambe hopi cas ta haya bishita di e bestia indesea aki.

   Ya caba den DIARIO di Diabierna a sali publica cu na Cashero #1 a haya un Boa cu tabata bibo y drumi den un wandmeubel den sala.  Esaki tabata uno di como 1.25 meter largo.

   Awor a bin haya sa, cu na e adres Cashero #40 tambe a haya un Boa, y esaki ta di 2.20 meter y el a wordo haya den cura di cas mey-mey di matanan.

   E ciudadano señor Henriquez cu tur dia ta cuida su matanan di anasa, no a imagina cu e lo bin topa cu un reptil asina grandi.

   El a splica DIARIO cu den oranan di mainta e tabata muhando su matanan ora cu el a mira algo ta move den mey-mey di e blachinan. El a yama un amigo di dje y ora a bin wak nan a mira un Boa scondi y lora den e matanan.

   Cu un hak special a bin saca e reptil, y nan sorpresa ta ora nan a sake e ora numa a mira cu e ta basta largo y gordo.

   Un Park Ranger tambe a bin na elugar y a keda asombra di e grandura di e bestia. Nan a  pone abao y a midie y e ta midi 2.20 meter di largo y tabata pisa 5 kilo y pico.

   Henriquez a relata na DIARIO cu e tabata duna parhanan eybanda tambe cuminda tur dia y tambe algun pushi, pero diripiente e no ta wak nan mas. E no sa si e boa aki a come e parhana y e pushi.

   E Park Ranger a bay cu e boa pa nan sigui haci mas investigacion riba dje.