Santa Rosa ta felicita tur agricultor riba e dia special aki

ORANJESTAD (AAN): Oficialmente awe Diasabra 16 di October 2021 ta ‘World Food Day’, yama tambe ‘Dia di Alimentacion’.

   E ta un momento pa reflexiona, y pensa con mundo a haya su mes confronta cu un pandemia cu a habri wowo di hopi riba e importancia di produci bo propio alimento.

   For di e pensamento aki a bini cu e lema pa Dia di Alimentacion pa e aña aki cu ta: “Nos Accionnan Ta Nos Futuro.”

   Corda e dicho aki? ‘Bo ta loke Bo ta come’. E alimentonan cu nos ta scoge pa consumi y na e manera cu nos ta consum’e ta afecta nos salud, como tambe salud di nos planeta. E tin un impacto riba e forma con e sistema agricola ta funciona.

E Secretario General di Nacionnan Uni a convoca e prome cumbre, ‘Cumbre di Sistemanan di Alimenticio’, den luna di september pa lansa accionnan nobo pa transforma e forma con mundo ta produci y consumi alimento. E obhetivo ta pa bolbe riba e caminda pa logra e metanan estableci pa yega na un desaroyo sostenibel. Nos tur mester forma parti di e cambio (of trayectorio aki).

   E futuro di alimentacion ta den nos man:  Un sistema agricola ta un metodo compleho cu por mustra dificil pa alcansa, pero bo tabata sa cu nos bida ta depende di dje? Cada bes cu nos come, nos ta participa den e sistema. E alimentonan cu nos ta scoge, e forma con ta produci, prepara, cushina y warda nan ta haci nos un parti integral y activo di funcionamento di e sistema di agroalimento.

   Un sistema agricola sostenibel ta uno cu ta dispone di un variedad amplio di alimento nutritivo y sigur na un prijs accesibel pa tur hende. Asina ningun individuo ta sufri di hamber y tampoco ta sufri di algun tipo di desnutricion.

Di e manera aki e rekinan den supermercado y tienda por ta yen, pero e desperdicio di alimento ta menos y e cadena di suministro di alimento ta mas resistente na e impacto di por ehempel: clima extremo, prijs halto, pandemia, degradacion ambiental of otro cambio climatico.

   Pa e motibo ey un sistema agricola sostenibel ta brinda seguridad di cuminda y nutricion na tur individuo, sin compromete e basenan economico, social, y ambiental pa e futuro generacionnan. Un sistema agricola tambe ta conduci na un miho produccion, miho nutricion, miho medio ambiente y un miho bida pa tur hende.

   Pakico preocupa:  E sectornan di e industria agricola ta emplea mas di un biyon di persona mundialmente, mas cu cualkier otro sector economico. Ademas, e manera con nos ta produci, consumi y anda cu desperdicio di alimento, lamentablemente ta costa nos planeta un prijs halto, poniendo un presion innecesario riba e recursonan natural, medio ambiente y clima.

   Tambe cu demasiado frecuencia, produccion di cuminda ta degrada of destrui habitatnan natural y ta contribui na extincion di especie. E sistema di cultivo aki ta costa nos triyon di placa. Riba esey, mundialmente e sistema agricola actual ta vulnerabel pa desigualdad y inhusticia. Tres miyon di hende no ta permiti pa disfruta di un diet saludabel, mientras cu sobrepeso y obesidad ta sigui aumenta den henter mundo.
   E pandemia COVID-19 a subraya cu mester di un cambio di ruta urgentemente. el a haci’e ainda mas dificil pa e agricultornan, cu ya caba ta lidiando cu e fluctuacion di un clima extremo, sali for di nan cosecha, mientras cu pobreza ta pusha un mayor cantidad di residente pa uza banco di cuminda, y miyon di hende mester di yudansa di emergencia. Segun estudio, pa 2050 mester di industrianan di cultivo cu ta capaz di alimenta 10 biyon di hende.

   Loke tin di haci awor:  Solucion tin! Gobierno mester reevalua su politica bieu y cambi’e pa uno nobo cu ta fomenta e produccion sostenibel di alimento nutritivo accesibel y cu ta promove e participacion di e agricultor.

   Politiconan mester promove igualdad, educacion, inversion den innovacion, ofrece rednan di seguridad pa e agricultor chikito y reforsa inmunidad climatico.

Tambe mester evalua e varios vinculo entre e areanan cu ta afecta e sistema alimenticio, cu ta: educacion, salud, energia, proteccion social, finansa y e habilidad di por concretisa solucionnan.  Mester respalda nan cu un aumento importante y responsabel di inversion, y un apoyo fuerte pa reduci e impacto ambiental y social negativo den tur sector. Particularmente, sector priva, sociedad civil, investigadonan y e mundo academico.

   Nos accionnan ta nos futuro: Gobierno, sector priva, sociedad civil, organizacionnan internacional y e mundo academico tambe lo bay tin mester di nos ayudo.

   Nos mester influencia loke ta trata e produccion di nos alimento y aumenta nos demanda pa alimentonan nutritivo produci na un manera sostenibel. Na mes momento nos mester ta mas sostenibel den nos accionnan diario. Na prome luga nos mester reduci e perdida y desperdicio di alimento. Nos mester tin e responsabilidad pa manda un mensahe pa crea conscientisacion riba e importancia di salud y un bida sostenibel. Nos mester haci un esfuerso pa mitiga cambio climatico y degradacion ambiental. Nos tur mester di dje. Nos mester activa un movimiento di alimentacion cu ta defende e cambionan ambicioso aki.

   Di parti di Departamento di Agricultura, Cria y Pesca-Santa Rosa, nan ta encurasha tur persona, pa cuminsa planta den nan cura pa hunto por logra un seguridad di cuminda pa famia y cu e posibilidad cu esaki por bira un forma di entrada adicional, asina aportando na economia local.