“Duna e local chens pa por crece”

Sra. Vera Oduber di Oduber’s Golden Palace & Boutique

ORANJESTAD (AAN) – Oduber’s Golden Palace & Boutique, situa na Cumana 71 ta un negoshi local estableci for di 1992.  Señora Vera Oduber doño di Oduber's Golden Palace & Boutique ta conta: 

Comienzo di e negoshi

“Mirando cu den pasado mi a traha den un joyeria pa hopi aña y mi tabata tin experiencia, e ora mi a wordo acerca pa un persona, si mi por a yuda bende algun joya. Y asina mi a cuminsa y mi a gusta, y mi a cuminsa bende riba mi mes pa mi por tabata tin mas entrada.

Na 1992 a dicidi di habri un negoshi propio y nos tabata bende di cas pa cas, di oficina pa oficina y despues cu ayudo di conocirnan y familianan cu peticion pa nan tambe a haya oportunidad pa yuda cu e benta. E tempo ey no tabata tin hopi fondo pa cuminsa cu un negoshi bira grandi y tabata dificil pa haya un prestamo grandi na banco. Pero cu lucha y esfuerzo nos a cuminsa habri un cuenta na Merca pa asina nos por a haya joyanan pa bende. Y por bisa cu e negoshi a expande lihe, pasobra e tempo ey no tabata tin hopi competencia. Nos tabata tin un boutique tambe y na aña 1993 nos a bira un N.V.  Cu hopi lucha y sacrificio, oranan largo ta traha te marduga pa prijs productonan ta haci cu awe  nos tin 29 aña di existencia. Y keto bay nos tey, pero bendemento di paña si tin 2 aña caba cu no ta bende mas ya cu esey a bira hopi cansancio.

Den nos negoshi nos ta bende joyas di oro, plata, stainless steel, enchapa, oloshi, tambe cartera pa dama y cabayero, y un par di perfume.” 

Den pandemia

“Den e ultimo lunanan di pandemia aki, no a bay mucho bon pero nos tabata lora man pa haya tog e entrada pa cubri tur nos gastonan. Mi ta kere manera tur otro negoshi, e benta a bira menos, e oranan di trabao a bira menos, pero poco poco, nos ta yegando na e normalidad compara cu antes. Benta a cay hopi, aunke tin benta pero nada di balor manera tabata wordo bendi antes, mirando cu e prijs di oro a bira halto y e hende ta prefera di cumpra mas economico awendia.” 

Situacion actualmente y kier mira pa futuro

“ E situacion di Aruba actualmente ta bayendo atras compara cu antes, ya logicamente pa e problema di pandemia. Ta tristo pa mira hopi negoshi di hopi aña y cu hopi aña di sacrificio tin cu cera pa e problema di e pandemia cu a trece menos entrada, menos benta, pasobra no tin e fondo pa sigi cubri tur bo gastonan.

Pero pa futuro mi kier mira menos negoshi extranhero y duna e local e chens pa por crece.” 

Plannan pa futuro

“E ta algo dificil pa bisa awor, ya cu mi no tin un persona cu por sigui cu e negoshi y mi yiunan no kier sigui cu e negoshi. Mi ta bira hopi cansa di e situacion aki ya cu ta hopi estresante, bo ta bisa atardi bo ta cera pero bo tin di sigui traha anto e no ta facil. E edad ta subi y bo ta cansa mas liher di tur cos. E no ta facil manera den pasado, e ta hopi lucha pa bo mantene e negoshi tog na bida y pa bo cumpli cu tur bo gastonan mensual.” 

Situa

“Oduber’s Golden Palace & Boutique ta situa na Cumana  71.  E localidad ta hopi facil pa yega ya cu hopi hende no ta gusta bay den caya pa e problema di parkeer y tambe pa chollernan cu tin biaha ta kibra auto. Nos localidad ta facil pa yega,  pero mirando cu a traha un rotonde, e ta bira un tiki fastioso pa nos clientenan cu ta bin di direccion di Playa, pa yega directamente den nos cura. Pero si bo ta dal un ronchi na manera di bisa, of bin di Santa Cruz bo ta yega directamente den nos cura y nos ta cla pa sirbibo”.