Nan no tin material pa proteha nan mes
ORANJESTAD (AAN)- Presidente di Sindicato di Polis Arubano (SPA), señor Lito Lacle, den entrevista cu Matutino DIARIO a señala cu e practicamente tur dia, e coleganan di Surveillance Dienst ta atende cu asistencianan cu tin di haber cu problema mental.
“Esey ta e problema, y e miedo mas grandi cu tin riba caya, cu algo peor por pasa atrobe. Mando Policial hunto cu SPA ta haciendo su esfuerzo, pero di otro banda miembronan di Staten tambe tin cu haci di nan banda, pa nos conhuntamente, zorg pa traha na bienestar di pueblo di Aruba”, señor Lacle a indica.
Lacle a comenta cu si na e momentonan aki presenta un caso pa asistencia, polis no tin e material di siguridad pa bisti legalmente, manera body camp, ni body dash, ni chaleco salbabida. Esakinan no ta accesible, y si wak e prome tragedia cu a sosode na 2017, nuebe aña a pasa y te ainda cu no a haci nada.
El a reitera cu e Presidente di Parlamento y e Presidente di e Comision di Husticia di Staten, mester splica SPA precies ki ta sosodiendo, pasobra cu pasa dos luna por, pero 17 luna si ta di mas.
“Aworaki net dos siman falta pa recess caba, y ta suficiente tempo pa Staten prepara un contesta pa Sindicato di Polis Aruba”, Presidente di SPA, Lito Lacle, a remarca.
