Binticinco Chef na Aruba a ricibi curso di Mentor via AHATA

ORANJESTAD (AAN): Restaurant y hotel na Aruba tin dificultad di haya suficiente empleado pa traha den cushina.

Pa yuda soluciona e problema, AHATA a crea un programa pa yuda chef ehecutivo train empleado sin mucho experiencia pa por haci e trabao culinario.

   AHATA a colabora cu SVH (Stichting Vakbekwaamheid Horeca), cual ta e certificacion oficial na Hulanda pa e sector di hospitalidad pa ofrece e curso y certificacion pa chefnan na Aruba.

   Como 25 chef cu ta traha na diferente restaurant y hotel cu ta miembro di AHATA a participa den e curso di dos dia. E curso a prepara nan pe e test di certificacion di SVH, cual test a tuma lugar e di tres dia. Aki dos siman e participantenan lo ricibi resultado y AHATA lo organiza un ceremonia pa entrega di e  certificadonan. 

   Cu lidernan certifica como mentor den cushina, e compania tin mas oportunidad pa desaroya y cultiva personal nobo cu tin menos experiencia. Danki na sponsorship di Aruba Marriott Resort, Hyatt Regency Aruba, y AHATA, e curso exclusivo aki a worde ofreci na un prijs hopi atractivo. AHATA ta sigui traha pa continuamente sostene y ofrece su miembronan diferente recurso cu ta beneficia e compania y nos producto turistico.