ORANJESTAD (AAN): Ministerio di Asuntonan Economico hunto cu Camara di Comercio (KvK) a organiza un asina yama ‘Trade Mission’ pa Colombia,
pa busca maneranan pa mehora ainda mas e lasonan comercial entre otro cu e pais.
Durante un conferencia di prensa Sue-Ellen de Freitas Sousa di KvK a hiba palabra y a splica cu un di e metanan di KvK ta pa stimula comercio tambe cu otro paisnan.
“Riba iniciativa di e minister nos ta encarga cu organizacion di e Trade Mission, cu ta inclui e guia tambe na Colombia ora cu esaki cuminza, esta ehecucion y coordinacion di e agenda completo”, segun de Freitas Sousa.
El a splica cu e programa ta consisti di ‘match making’ cu ta un aspecto hopi importante, unda cu negoshinan por beneficia di esaki.
“Nos ta conta cu sosten di Holland House cu ta yuda negoshinan den Reino Hulandes pa cera lasonan cu Colombia”.
Ta hopi importante pa e negoshi local duna nos un indicacion riba kico ta e producto of servicio cu nan tin interes den dje, pues ta hopi importante pa describi esey specificamente pa asina di nos banda hunto cu Holland House por busca un bon match, segun de Freitas Sousa.
El a sigui bisa cu ta bay duna presentacionnan riba topiconan importante manera impuesto, logistica y mas.
E fecha di e Trade Mission ta bay ta di dia 22 te cu 26 di Mei y pesey ta pidi esnan interesa pa mas pronto posibel haci registracion.
El a splica cu Diahuebs awor lo tin un ‘follow up session’/registracion, unda cu e minister lo ta presente, mientras cu online por haci pregunta na representantenan di Holland House.
