Binti mata a keda planta na 'Hof'i Joy' na Biblioteca Nacional

Den cuadro di e proyecto di WCA: '90 mata pa 90 aña'

*Un bunita concepto y sostenibel den centro di Oranjestad 

ORANJESTAD (AAN):   Despues di algun tempo di preparacion, diasabra mainta a tuma lugar na Biblioteca Nacional, e ehecucion di e bunita proyecto di planta 20 mata na 'Hof'i Joy', cual ta un iniciativa di Biblioteca Nacional Aruba y Women's Club of Aruba.

            Den cuadro di e di 90 aniversario di WCA, e organisacion a dicidi di planta 90 mata na diferente organisacion na Aruba pa medio di e iniciativa '90 mata pa 90 aña' y den esaki BNA ta parti di dje.

            Un plantamento simbolico a tuma luga na september 2024 ora cu a planta e prome mata na Biblioteca Nacional Aruba - Arubiana Caribiana na Bachstraat.

            Directora di Biblioteca Nacional Aruba, Sra. Astrid Britten a conta den entrevista cu DIARIO cu hunto cu Coordinador di 'Hof'i Joy',  Ronnie Alders a sinta  despues cu WCA y a wak e espacio cu biblioteca tin patras.  WCA tambe a traha hunto cu Fundacion Ban lanta y Planta representa pa Sra. Anita Mijts-Aerts, cu ta e organisacion cu tin un par di aña caba activo. Nan a wak e lugar y a conclui cu e espacio ta bon pa planta 20 mata, esta matanan di Aruba mes.

            'Hof'i Joy' tabata existi caba. Awor a amplia su capacidad y ta haya un bida nobo cu e proyecto aki pasobra awor a bin mas mata acerca creando un concepto bunita y sostenibel den centro di Oranjestad.

            Diasabra mainta, e organisacionnan a lora manga hunto y asina e matanan a wordo poni cu gordura y tera mescla den e buraconan cu a keda coba den e dianan aki di preparacion door di un compania di 'landscaping'.

            "Nos ta contento di por ta parti esey y e ta e sentido tambe di bo 'community garden', cu e ta pa tur hende. Mi mester bisa cu dentro di un par di luna si tur cos ta bon nos ta bayendo un conferencia na Corsou y esey ta e conferencia di Caribe di bibliotecanan, ACURIL, anto nos tin un grupo cu ta papia di e parti di sostenibilidad, ambiente y 'green libraries'. Ronnie lo haci un presentacion loke ta un bon oportunidad pa nos wak e ehecucion di esey", Britten a bisa.

            El a agrega cu actualmente, un di e organisacionnan cu ta uzando 'Hof'i Joy' ta Hunga Teca y nan ta uz'e pa nan actividadnan riba diasabra. Den e hofi ademas di e 'community garden' por disfruta di 'sustainable art' cu un mural di mosaic cu ta arte expresa pa medio di naturalesa.

            E intension tambe ta pa 'Hof'i Joy' bira un espacio mas di biblioteca pa e usuario bay sinta bebe un te, un koffie, lesa un buki riba un banki. Esey por duna e luga su balor y tambe pa bo sinti cu bo ta den stad, pero cu bo ta den un tiki naturalesa, Astrid Britten a expresa.

            Riba potret por aprecia e momento cu diasabra mainta tur esnan involucra den e proyecto a presenta na 'Hof'i Joy' pa inicia cu e plantamento di e 20 matanan.

             Keda pendiente pa mas informacion relaciona cu e iniciativa aki. Masha pabien cu e bunita proyecto aki!.