Biblioteca Nacional Aruba ta invita comunidad pa presencia un maraviyoso anochi di Tambu

*Presenta pa Aruba, Curacao, Venezuela, Colombia y Republica Dominicana cu nan diferente ritmo

ORANJESTAD (AAN) – Glenda Maduro, di Biblioteca Nacional Aruba (BNA), a informa den entrevista cu DIARIO, cu diahuebs awo, dia 10 di juli, ta bay tin un anochi di tambu, na BNA.

E presentacion lo tuma lugar den e hall di Biblioteca Nacional na Oranjestad, 7’or pa 9.30’or di anochi, y  porta ta habri pa pueblo di Aruba bin presencia e bunita evento aki.

“Esaki ta bay ta algo espectacular, na unda nos ta bay tin Venezuela, Colombia, Republica Dominicana, Curacao y Aruba cu ta bay haci un presentacion Diahuebs awo pa 7’or di anochi”, señora Maduro a duna di conoce.

“E lo ta algo maraviyoso, y nos ta hopi contento cu tur e residentenan, vooral di Venezuela cu Colombia y Republica Dominicana, biba na Aruba a acepta e invitacion y nan ta bin haci un demostracion di Tambu, e anochi aki”, señora Maduro a expresa.

Señora Maduro a comenta cu aña pasa na BNA a tuma lugar e celebracion di Dia di Colombia, y nan a bin cu e ritmo di Vallenato.

“E luna aki ta un actividad, eigenlijk, multicultural, e oportunidad di mustra nan talento, pusha nan folklore, y nan ta haya nan fecha di Independencia, tanto Venezuela como Colombia, y Republica Dominicana net den te temporada aki, anto conhuntamente cu Aruba y Curacao nos ta celebra hunto cu nan e dia ey”, señora Maduro a relata.

El a agrega cu pa e motibo aki a dicidi di bin cu e ritmo di Tambu, pasobra den cada pais e ta diferente.

“Hasta mi por bisa cu Venezuela ta bay bin e anochi aki cu cuater musico. Eynan bo ta mira caba, con e Tambu ta cambia. Tur pais tin diferente Tambu y diferente nomber y diferente sla. Esey ta loke nos ta bay demostra e anochi aki, con e diferente paisnan ta tok’e y bali’e y tambe nan ta bay conta historia con e Tambu a drenta nan pais, con el a drenta akinan, y e ta bay ta un anochi hopi leuk y bunita” señora Glenda Maduro a reitera.

Señora Maduro ta extende un invitacion na Pueblo di Aruba, specialmente e culturistanan pa bin presencia e anochi aki, pasobra nos ta hacie pa pueblo di Aruba, pa nan por bin celebra hunto cu BNA e anochi di Tambu.