Invitacion pa tur profesional cu ta trata herida
ORANJESTAD (AAN): Pa di siete biaha Horacio Oduber Hospital (HOH) ta organizando un simposio specialmente pa profesionalnan cu ta trata herida cerca pashentnan. Un simposio semper super bon bishita cu e biaha aki lo tuma luga na Embassy Suites riba 25 y 26 di september 2025. E di siete edicion di Island Wound Care Symposium ta hiba e nomber di “Navigating the Futuristic Landscape in Wound Care”.
HOH ta organiza e simposio aki cada dos aña y esaki ta e di siete biaha cu diferente profesional di e region, internacional como tambe local ta bini hunto pa siña lo ultimo cu tin di haber cu tratamento di herida, pero tambe papia kico tur ta encontra durante nan trabao diario y mas. Dos dia di un programa yena di oradornan local y internacional cu temanan cu tin di haber cu e futuro den cuido di herida y mas.
Drs. Yuri Casseres, ciruhano general y manager medico na HOH, a comenta cu: “Cuido di herida no ta para keto y semper tin cosnan nobo y tecnicanan nobo di con pa trata y cura un herida. Na Aruba, nos tin problema grandi cu loke ta herida cronico manera esnan cu diabetis, herida di trauma y oncologia.” HOH ta hopi orguyoso di coleganan cu ta traha na Center for Advanced Wound Care cu sigur a evoluciona durante añanan como un di e centronan den region mas respeta pa loke ta cuido di herida.
Lo conta cu diferente orador local y internacional manera Paul Kim y Dr. Lowell S. Kabnick. Tambe lo ta un honor pa ricibi como un di e keynote speakers dr. Percy Ho-Kang-You kende ta un ciruhano cu tabata traha na HOH y ta esun cu cu a yuda forma e actual departamento di cuido di herida. Banda di e oradornan ya menciona lo tin hopi mas profesional cu lo bay hiba palabra. Por subi pagina web di HOH www.arubahospital.com unda por lesa tur detayes di e symposium aki y di biaha por registra online tambe.
E simposio ta pa docternan di cas, specialistanan, enfermeronan, podotherapeut, therapistanan y tur otro profesional cu tin contacto cu pashentnan cu tin herida. Un invitacion na tur interesado pa bishita nos website, registra y join nos na e di siete edicion di Island Wound Care Symposium riba 25 y 26 di september venidero.
