Si tur cos cana bon Nanki Condos at Baby Beach ta keda cla pa fin di otro aña

*E vision ta pa ofrece algo diferente na locual tin caba

ORANJESTAD (AAN):  E proyecto di Nanki Condos at Baby Beach ta den full swing y durante un entrevista cu CEO di Nanki Alberto Perret, el a splica cu e ta verwacht cu e structura di e edificio lo keda cla pa mitad di luna di Augustus, mientras cu e construccion completo di e Condominium di 40 camber lo ta cla pa fin di otro aña.

“E ta bay ta un edificio di apenas dos piso, pues e lo cuadra bon cu naturalesa”.

Nos ta bay planta palonan di coco tambe, pa e mustra manera e Nanki Club di pasado, segun Perret.

El a sigui bisa cu e proyecto ta dirigi riba personanan cu ta gusta ‘outdoors’, cu ta inclui por ehempel kite surfing.

“Nos vision pa Serie Colorado y San Nicolas ta algo diferente cu locual tin na Palm Beach”.

Ta solamente 40 unidad y tur tin un bunita bista.

Nos no tin un restaurant den nos edificio, pa asina e bishitantenan por bay San Nicolas pa lunch y cena y disfruta di e establecimentonan y e ciudad, segun e CEO.

El a splica cu pesey ta importante pa Gobierno keda cla cu e caminda.

Segun Perret e ta den contacto cu Gobierno y cu su compania semper ta dispuesto pa yuda cu cualkier cos cu por.

Pa loke ta interes pa cumpra un di e Condominiums aki, Perret a indica cu 45 porciento di e proyecto ta bendi caba sin hopi esfuerzo.

El a indica cu sigur tin un mercado pa esaki.

“Ta e tipo di proyecto unda cu economia di San Nicolas lo probecha di esaki”.

Nos concepto ta pa hendenan bishita San Nicolas y gasta placa.

E bon ta cu tin un clientela cu kier algo diferente di locual nos tin caba na Aruba, segun Perret.

El a bisa tambe cu esaki ta un proyecto sostenible, unda cu por ehempel awa ta wordo recicla.

E meta ta pa opera na un manera hopi ‘berde’.