Segun señora Cheryl Rosa-Fingal di IVA:
ORANJESTAD (AAN): Den un entrevista cu Matutino DIARIO, Inspector di Inspectie Volksgezondheid Aruba (IVA), señora Cheryl Rosa-Fingal, a duna di conoce cu gran parti di e kehonan cu IVA ta ricibi ta relaciona cu e cuido cu ta wordo brinda den casnan pa adulto mayor, y no necesariamente riba e personal.
Segun Rosa-Fingal, ta di suma importancia pa dunadornan di cuido dispone di e preparacion y estudio necesario den e ramo, pa asina nan por brinda un servicio adecuado y responsabel na nan clientenan. Sinembargo, el a reconoce cu pa logra tin suficiente personal cualifica ta sigui representa un reto grandi pa IVA y pa e sector di cuido.
El a splica cu no ta facil pa haya personal pa traha den casnan di cuido, specialmente pasobra hopi di e instancianan aki no ta subsidia y e costonan operacional ta halto. Ademas, personanan cu ta debidamente prepara den e ramo tin oportunidad pa opta pa otro lugarnan di trabou, manera hospitalnan of SABA, unda e condicionnan salarial por ta mas atractivo, particularmente mirando e costo di bida halto na Aruba.
Rosa-Fingal a enfatisa cu IVA ta sigui pone enfasis riba necesidad di tin personal adecuado y cualifica, cu por responde na diferente condicionnan di salud cu por presenta den un cas di cuido. Como ehempel, el a menciona cu un cuidador cu no tin suficiente conocemento tocante Alzheimer por tin dificultad pa maneha cambio di comportacion of agresividad cu por presenta cerca algun pashent, algo cu por afecta tanto e calidad di cuido como bienestar di e cliente.
E inspector a indica cu algun director di casnan di cuido ta expresa dificultad pa haya personal cu ta cumpli cu e exigencianan estableci. IVA, sinembargo, ta considera necesario pa tin por lo menos un verpleegkundige of un verzorgende IG disponibel pa garantisa un nivel minimo di cuido profesional.
Segun Rosa-Fingal, IVA ta observa cu na algun cas di cuido tin un cambio frecuente di personal, mientras cu otro instancianan ta logra mantene mas stabilidad den nan ekipo. E diferencia aki por tin impacto directo riba continuidad y calidad di e cuido brinda.
El a agrega cu Directie Ouderenzaken ta trahando riba oportunidadnan di schooling y capacitacion, como un manera pa fortalece e sector.
Rosa-Fingal a conclui indicando cu IVA ta colectando informacion di diferente cas di cuido y lo structura e datonan aki pa obtene un mihor bista di e situacion actual. E meta ta uza e informacion pa identifica camindanan di mehoracion y contribui na un sistema di cuido mas solido, profesional y sigur pa adultonan mayor na Aruba.
