Biblioteca a mustra Ministro Endy Croes riba e importancia di pa un airco grandi

ORANJESTAD (AAN): E ta algo cu pa hopi decada tabata e dolor di cabez pa tur esnan cu ta traha na Biblioteca Nacional den Madurostraat na Playa.

   Tempo cu el a wordo inaugura den decada di 1980, e Biblioteca aki a wordo considera como un joya di edificio.  Su sistema di airco tabata perfecto, y hasta ora bo bay eynan pa haci les den Studie Zaal, e tabata haci masha frieu mes.

   Pero despues ora cu e sistemanan a cuminza perde eficiencia y deteriora, ta semper e lugar aki a haya problema cu airco.

   Diahuebs ultimo Minister Endy Croes a reuni cu directora di Biblioteca Nacional Aruba, señora Astrid Britten. E mandatario a enfatisa cu e reunion a bay den un bon atmosfera y a toca varios tema cu lo bay haya atencion di ministerio di enseñansa y deporte durante e proximo 4 añanan.

   Algun di e temanan cu a bin pa dilanti ta entre otro: e necesidad di mantencion di e luga y e prioridad pa un airco grandi.

  A papia di e MOU cu City of Boston y un programa nobo cu Biblioteca ta sostene di Full Stack Foundation “CoderDojo”. Durante e reunion e mandatario a ricibie e relato anual 2020 di Biblioteca Nacional Aruba y e document di “Strategische doelstellingen en beleidsprioriteiten  2021- 2025”.

   Minister Endy Croes su deseo y empeño ta pa soluciona problematicanan mas tanto posibel, crea espacio pa trankilidad, paz y mehoracion den e tereno di Enseñansa.