Dr. Wilmer Salazar: --*Pero entre otro, e por wordo transmiti di hende pa hende
ORANJESTAD (AAN) – Docter Wilmer Salazar a sigui elabora, den entrevista cu DIARIO, riba e tema di “Helicobacter Pylori” aportando un relato extenso y sumamente valioso, cu ta abarca tur angulo posible, pa nos comunidad keda bon informa al respecto.
DIARIO a puntra docter Salazar: “Helicobacter Pylori” (HP) ta wordo transmiti di hende pa hende.
“ Ainda tin poco claridad encuanto e caminda den cual e infeccion di HP ta wordo adkiri; kiermen, ainda no ta bon estableci con un persona ta haya e infeccion aki, y no ta cla tampoco con un e bacteria ta wordo transmiti di un persona pa otro.
Estudionan haci den medio cientifico y rapportnan medico a apunta cu e bacteria lo cana e siguiente ruta di transmision:
1) Boca pa boca: tartar di djente (sarro dental) por ta un reservorio di H P.
2) Gastro- oral: sacamento .
3) Feco-oral, musca ta contamina cu e bacteria y ta transporte na cuminda of utensilionan (forki, cuchara,).
4) Agua contamina
5) Consumo di vegetalnan curu of carni contamina cu HP. (A wordo mustra cu den berduranan curu, carni galiña, lechi y yogurt cu deficiente conservacion, e bacteria por keda bibo pa algun ora).
Caracteristicanan socio-cultural y condicionnan higienico-sanitario deficiente por ta un factor di riesgo den e proceso di infeccion-malesa door di HP”.
- Ora un persona a haya infeccion pa HP, esey kiermen cu ta haya ulcera of cancer di stoma?
“No necesariamente ta asina. Infeccion pa HP pa su mes, no ta suficiente pa desaroya gastritis, ulcera (maagzweer) of cancer di stoma. Pero, e efecto acumulativo di un sorto di factornan manera virulencia di e bacteria HP, clima-ambiente, antecedentenan genetico y inmunidad mes di e persona afecta, pa e bacterianan cu ta biba den e stoma y tripa, habito di cuminda (masha poco fruta y berdura fresco y hopi cuminda procesa), uso di medicamentonan, estilo di bida (poco movecion, humamento, consumo di alcohol, etc) , tur hunto ta determinante si e persona cu a haya infeccion pa HP ta keda asintomatico of por desaroya un malesa grave di stoma”.
Helicobacter pilory y cancer:
“Den hende adulto susceptible infecta, HP ta inflama e stoma (maag) dunando sintomanan, den un tempo largo, manera dolor, kimamento di stoma, refluho gastro-esofagico, perdida di peso, sensacion di stoma yen, etc. Y lo por duna como consecuencia un lesion premaligno cu despues lo por desaroyaden un cancer di stoma (maagkanker).
E risico pa cu e cancer di stoma progresa ta varia y ta relaciona cu e persona mes (estilo di bida: cigaria, alcohol, poco movecion, consumo di cuminda cu hopi salo, den bleki y cuminda cu poco contenido di antioxidante, condicion genetico y familiar, entre otro) y factornan patogenico di e bacteria (genotipo, virulencia, produccion di toxina, adhesinas, urease, etc). Helicobacter pylori ta e prome bacteria apunta manera ‘Bacteria CARCINOGENO’ pa e Agencia Internacional pa Investigacion di Cancer (IARC) di Organisacion Mundial di Salud (OMS)”, Dr. Wilmer Salazar a subraya.
Den un ultimo articulo Dr. Salazar ta papia tocante prevencion, y e posible repeticion di e bacteria cerca un persona cu a haye y a tuma tratamento.
