Bestaansminimum a baha cu algun Florin durante luna di Juni 2021

ORANJESTAD (AAN): E bestaansminimum ta e nivel minimo di entrada cual ta worde percibi cu ta necesario pa logra mantene un nivel di bida adecuado den un cierto pais.

   Usualmente e bestaansminimum ta worde determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta worde yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”.

   Escalanan di ekivalencia ta worde usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0-15 aña).

   E bestaansminimum ta basa riba cifranan di e rapport “Bestaansminimum 2010” cu CBS a publica na December 2010 y ta worde actualisa mensualmente pa cu inflacion usando e CPI mensual.

   E unidad di referencia den e rapport aki ta di un hogar cu ta consisti di 2 adulto y dos mucha (edad 0-15 aña).

   Na Juni 2021 e bestaansminimum mensual pa un hogar cu ta consisti di 2 adulto y dos mucha (edad 0-15 aña) (Afl. 4.770) ta mustra un caida di Afl. 12 compara cu Juni 2020 (Afl. 4.782) y a worde causa principalmente door di un caida di Afl. 26 den e sector di “Paña y zapato”.

   Na Juni 2021 e bestaansminimum mensual pa un hogar cu ta consisti di un solo adulto ta Afl. 2.271, cual ta representa un deficit di entrada di Afl 456, un caida di Afl. 95 compara cu e deficit observa un aña pasa (Afl. 551). E deficit aki ta e di dos mas abao registra den un periodo di 5 aña pa luna di Juni.