ORANJESTAD (AAN): Mirando e alto grado di contagio cu e variante Delta ta causando, e Centronan pa e Control y Prevencion di Malesanan di Merca (CDC)
diamars a actualisa nan guia di uzo di tapaboca pa recomenda e personanan cu ta completamente vacuna pa uza esakinan den areanan cera si nan ta den areanan cu transmision 'substancial' of halto di Covid-19, cual ta inclui mas di e mitad di e countynan di Merca.
Casi mitad di e countynan di Merca (46%) tin actualmente un transmision halto y 17% tin un transmision 'substancial', segun datonan di CDC.
Mientrastanto, e guia pa e personanan no vacuna ta mescos: nan mester continua uza nan tapaboca te ora cu nan ta vacuna completamente.
E guia mas recien di CDC tambe a recomenda pa e lidernan comunitario haci un yamado na e vacunacion y e uzo di tapaboca pa preveni contagionan nobo den areanan di transmision substancial y halto.
CDC ta recomenda tambe pa fomenta e uzo di tapaboca na e maestronan, personal, studiantenan y bishitantenan di e scolnan, independientemente di e estado di vacunacion.
Dr. Anthony Fauci, asesor medico hefe di Covid-19 di e presidente y director di e Instituto Nacional di Alergianan y Malesanan Infeccioso, a bisa diadomingo cu e revision di e guia di tapaboca pa e mericanonan ta bao consideracion activo y cu e tabata parti di e discusion.
Fauci tambe a bisa cu Merca tabata bayendo di e direccion ekivoca den e medida cu e number di casonan di Covid-19 ta sigui aumenta, particularmente entre e mericanonan no vacuna.
