Segun mayor haya fecha ta tardando: -ORANJESTAD (AAN) – Di nobo a surgi preocupacion den parti di comunidad,
debi na e hecho cu solamente Diamars, segun datonan di DVG, 47 caso positivo nobo di Covid -19, a wordo registra localmente, mas 8 turista contagia.
Si e situacion sigui asina unda un grupo grandi di nos hendenan no kier vacuna, ta ki dia Aruba ta logra su “herd immunity”?
Na Mesa di redaccion di DIARIO a drenta comentario di un mayor, cu ta bisa cu el a registra su dos yiu adolescente, un di 13 aña y otro di 15, mas cu un siman pasa y ainda nan no a haya cita pa e prome vacuna. E mayor aki ta haya cu mirando cu aña escolar nobo ta habri como dentro di tres siman, no ta bay logra pa e muchanan cu si ta dispuesto y ta desea di haya e vacuna, drenta scol sikiera un tiki proteha.
Tin hende ta comenta cu nan tabata tin e preocupacion aki for di tempo di campaña y eleccion, pasobra nan a mira, vooral, den e partidonan grandi acumulacion di hende y ningun di dos por bisa cu no ta berdad. Hende riba caya, hende riba truck, autonan full yen, y posiblemente hopi di e simpatizantenan di partido aki, no tabata full vacuna of kizas sin un vacuna.
Ainda tin hopi hende na Aruba cu ta papia contra e vacuna y ta difundi versionnan sin pia ni cabes, sin cu nan tin prueba, y lamentablemente tin hende ta haci caso di tur cos robes cu ta wordo bisa.
Den un noticiero di Univision, recientemente, un docter a bisa cu e asina yama inmunidad comunitario (herd immunity) no por wordo logra tanten cu no menos cu 80 pa 85% di e poblacion ta vacuna. Esaki ta conta pa mayoria pais unda cu tin e gruponan di hende terco of malintenciona cu no kier vacuna y cu ta influencia nan mes yiunan cu tin e chens di ricibi e vacuna, pa nan no tume.
Na Aruba, no ta e mayoria di e hubentud ta vacuna, y di esnan cu si kier y cu a registra ta wardando mas cu un siman caba sin wordo yama. Ta Dios so sa cuanto caso mas di contagio lo drenta Aruba via famianan cu a bay afo cu vacacion y cu no obstante podise e adultonan (mayornan) a biaha ya vacuna pero e yiunan no. Berdad no ta un situacion comodo cu por tuma “suavemente” manera nada ta pasando.
Hopi hende a probecha cu a flexibiliza casi tur medida, pa comporta manera ya no tin covid-19 akinan. Hasta den comercio no tin suficiente control mas. No ta teniendo cuenta cu e variante Delta, ni cu e hecho cu apesar di e vacuna (tur dos dosis) bo por wordo contagia y bo por contagia otro hende, sea bo ta asintomatico of tin sintoma leve.
Por fabor, ban pone man na curazon y haci loke ta corecto cu ta no stop di uza tapaboca, hand-sanitizer, warda distancia y toch mantene distancia usando garoshi den supermercado maske sea pa cumpra un pan. Y sigur, DVG acelera e citanan di vacunacion bao nos hobennan di 12-17 aña cu a registra y ta wardando e fecha.
