Barconan Hulandes a yuda pa intercepta casi 5 ton di cocaina riba Lama Caribe

ORANJESTAD (AAN): E siman aki a bira conoci, cu un “Grupo di Tarea Hulandes Anti-Droga” a intercepta un cantidad considerabel di 4.735 kilo di cocaina riba Lama Caribe.

   DIARIO a compronde cu e barco di Marina Hulandes, esta Zr.Ms. Holland durante e ultimo tres simannan den estrecho colaborashon cu US Coast Guard y Guardacosta di Caribe Hulandes, a ehecuta diferente operacion contra droga. Den esaki Zr.Ms. Holland pa di prome biaha a tuma riba dje e coordinacion y administracion di e unidadnan participante, como Comandante di e ‘Surface Action Group’.  Den esaki el a keda sostene pa avionnan maritimo di patruya tanto di US Coast Guard como Guardacosta di Caribe Hulandes.  E colaboracion aki ya a conduci rapidamente na resultado!

   E ultimo tres simannan cu ta tras di lomba, e barco di Marina Hulandes Zr.Ms. Holland, den estrecho colaborashon cu dos Cutter (Fast Response) di US Coast Guard y e Cutter Panter di Guardacosta di Caribe Hulandes, a ehecuta operacionnan anti droga actuando como un Grupo di Accion (Surface Action Group).

  Den esaki Zr.Ms. Holland, pa di prome biaha a tuma riba dje e coordinacion y administracion di e unidadnan participante, como Comandante di e ‘Surface Action Group’ y como tal a keda sostene pa avionnan maritimo di patruyahe tanto di US Coast Guard como Guardacosta di Caribe Hulandes.

   Asina tabata tempran mainta riba Diahuebs dia 25 di November ultimo, cu un asina yama speedboat tipo Go-fast a keda intercepta. E boto rapido a wordo detecta pa sensornan abordo di Zr.Ms. Holland den cercania di un ruta conoci pa contrabanda.

   E barco patruyero despues di esaki a cuminza cu un persecusion y a lanza su botonan di intercepcion, esta e asina yama FRISC (Fast Raiding, Interception and Special forces Craft).

   E momento cu e tripulantenan di e speedboat Go-fast a ripara cu nan tabata worde persigui, nan a cuminza tira e paketenan di contrabanda den laman. Finalmente a obliga e Go-fast pa stop door di tironan di advertencia.

   Unabez cu personal a yega na e Go-Fast, nan a bay abordo y ainda a descubri mas o menos 200 kilo di contrabanda cu nan no a tira ainda den lama.  E cuatro tripulantenan ta procedente di Republica Dominicana y Colormbia, y nan a wordo aresta pa e funcionario di US Coast Guard cu ta nabegando cu e team.

   E barco a cuminza core e ruta, y a logra ‘pisca’ y saca bultonan cu a keda drief riba lama, y esaki a yega na 1.000 kilo di contrabanda for di laman.  Pues en total, e speedboat aki tabata transportando 1.200 kilo di cocaina, cu a ser kita for di riba mercado.

   Algun dia despues un biaha mas e funcionarionan a grita ‘bingo’. Durante un patruya di un avion Dash-8 riba 28 di november, e avion maritimo di patruyahe di Guardacosta di Caribe Hulandes, nan a nota un embarcashon sospechoso. A indica e posishon na Zr.Ms. Holland, despues di cua su FRISC y e helicopter di abordo, NH-90, a ser desplega y a dirigi un di e cutter nan di US Coast Guard direccion di e boto sospechoso.

   Pa ora cu e cutter Mericano a yega, ya caba e helicopter NH90 y e FRISC a obliga e otro speedboat Go-fast aki pa stop pa medio di tironan di atvertensha. E Mericanonan a detene tres tripulante y a confisca 1.855 kilo di cocaina.

   Riba dia 3 di December, un avion patruyero Mericano a dececta un speedboat Go-fast cu tabata nabega hopi rapido. Riba esaki un di e cutter nan Mericano ta ricibi orden pa intercepta esaki. Durante intercepcion, cuater tripulante a keda aresta y 100 kilo di cocaina nan a confisca.

   Algun dia despues un biaha mas un avion patruyero ta nota un speedboat Go-fast. E boto sospechoso tabata riba un distansha basta leu di Zr.Ms. Holland, pa cua motibo un persecucion largo a cuminza, pa intercepta e speedboat Go-fast.

   Despues cu a aserca e Go-fast basta djaserca, pero for di bista, e helicopter y ambos FRISC a keda lansa pa consecuentemente sorprende e tripulantenan di e Go-fast completamente. E team di Guardacosta abordo di e FRISC a haya, ademas di tres miembro di tripulante, casi 570 kilo di cocaina. E tres tripulantenan y e contrabanda a keda entrega na US Coast Guard.

   Dialuna 13 di December net fuera di bista di Zr.Ms. Holland, un avion patruyero a descubri un speedboat Go-fast ta cruzando Caribe.  Dentro di tempu cortico e helicopternan di bordo y ambos FRISC a keda lansa pa intercepta e Go-fast. E biaha aki si e Go-fast a nenga di stop, y despues cu a los tironan di atvertensha, na final francotirador abordo di Helicopter a mik y destrui cu algun tiro e motornan di e boto, y mesora e boto a keda drief sin por a move mas.

   E ora si e tripulantenan a hisa man den halto, y nan a keda deteni.  Abordo a confisca 110 kilo di contrabanda, cu a ser entrega na US Coast Guard.

   Como consecuensia di e colaborashon exitoso entre unidadnan di Defensa nabegando y bulando, US Coast Guard y Guardacosta di Caribe Hulandes, casi 5.000 kilo di cocaina a ser confisca y 17 tripulante sospechoso a wordo entrega na US Coast Guad pa ser persigui. Cu esaki e forma hopi estrecho di colaborashon aki tabata altamente exitoso y un biaha mas ta subraya e bon lazo cu ta existi enter US Coast Guard y e socionan Hulandes den Region Caribe.