Den entrevista cu Rubin Ponson: *E aña aki a resta dos container
ORANJESTAD (AAN) – Rubin Ponson, Experto di Explosivo na Departamento di Obranan Publico, y Hefe di e Team di Control di Vuurwerk, den un entrevista cu DIARIO, a duna un relato di con e proceso a bay durante e periodo di cendemento di clapchi, pa finaliza aña 2021.
Señor Ponson a cuminza indicando cu e aña cu a pasa a wordo importa 14 container en total, di cual entre 1 y 7 di Januari aki, ta e fecha segun reglanan, cu mester entrega tur sobra di clapchi bek, na e deposito na WELA, y esey a sosode.
Ponson a duna di conoce cu for dia 3 di Januari aki, a cuminza ricibi e clapchinan aki, y por bisa cu ta un total di dos container di clapchi, cu a sobra, a wordo entrega na WELA.
Kiermen cu di 14 container di clapchi 12 a worde bendi. “Si compare cu aña pasa, aña pasa nos tabata tin mas of menos diez container di clapchi cu a wordo reparti riba nos isla, y tur a wordo bendi. Dus, no a sobra nada di clapchi. E aña aki si, a sobra dos container cu a wordo warda na WELA y cu na final di aña lo por wordo bendi un biaha mas”, Rubin Ponson a reitera.
El a agrega cu loke ta remarcable ta cu e aña aki, e cantidad restante ta grandi. “Nos por calcula cu 80% pa 85% di e clapchinan cu a wordo entrega ta pagara. Nos ta calcula cu esaki ta debi na e reglanan di pandemia unda ultimo ora a pone orarionan pa comerciante por tira pagara y tur esaki a haci cu a bira un tiki dificil pa nan busca un pagara grandi kizas, y a haci hopi cancelacion riba e pagaranan aki y pa tal motibo esaki ta locual a sobra”, e experto a subraya.
CONTROL:
Encuanto e control, Rubin Ponson a splica cu esakinan a tuma lugar di dia 27 pa 31 di December, y por lo general esaki a bay hopi bon.
“Mayoria di nan ta hendenan cu anteriormente a bende caba y ya nan sa di e reglanan, y algun di nan kizas 3 pa 4 lugar a wordo cera pa un temporada cortico, un par di ora, pa nan haci ahustacion na e lugar, y despues a ser controla bek y por a wordo habri pa sigui bende” el a indica.
Ponson a reitera cu por lo general esaki a bay hopi bon. “Semper e control ta na su lugar si, pa mantene e seguridad pa un tur; e bendedornan, e cumpradornan, y pa esnan den vecindario tambe. Tambe mester bisa cu asina e aña a caba bon cu tiramento di clapchi, y nos ta spera cu e aña aki e ta bay mescos of miho. Semper e control ta bay deduci esey, con bon e procedure y benta di clapchi ta cana su caminda”, señor Rubin Ponson a conclui.
