Entrante dialuna orario lo bira 8’or mainta pa 8’or anochi:
ORANJESTAD (AAN) – Den conferencia di prensa di gobierno, un bez mas pa update e situacion di contagio di Covid-19, Minister di Salud Publico y Turismo, tambe a hiba palabra. El a anuncia cu entrante Dialuna 10 di Januari, e orario di vacunacion ta bira di 8’or di mainta pa 8’or di anochi na Centro Deportivo Betico Croes, y tambe lo pone un bus recore distrito y barionan, pa ofrece y aplica e 'booster shot'.
MONITOREO:
E dignatario a subraya cu tur dia e casonan ta wordo monitorea, mescos cu e hospitalisacionnan y e capacidad cu tin na ICU na Hospital y, ademas, e situacion di e personal di HOH, y ademas di esaki gobierno a tuma decisionnan mas estricto teniendo cuenta cu e balansa entre salud y economia.
E mandatario a señala cu apesar cu Aruba tin mas cu tres mil caso activo, e situacion ta bao control, aunke tin aumento di admisionnan e dianan aki. El a indica cu e hospitalisacionnan causa pa e variante omicron ta bay mas 'slow' cu e variante Delta.
Den varios investigacion haci rond mundo tocante con contagioso y peligroso omicron ta, den tur e estudionan cu a wordo haci, e resultado ta cu enberdad e ta mas contagioso, pero menos peligroso cu e otro variantenan, incluyendo Delta.
E dignatario a bisa cu por mira esaki na Aruba tambe, unda cu e estado fisico di e persona cu ta wordo admiti ta diferente cu esun cu variante Delta. Esaki ta duna un perspectiva un tiki mas positivo, mirando e cantidad halto di casonan cu nos tin na Aruba, algo mas cu 3 mil caso cu nunca nos a pensa cu nos lo yega, pero nos ta mira esaki na Corsow, Bonaire, Hulanda, y rond mundo ta experenciando e mesun tendencia aki, simplemente pasobra e variante aki ta mas contagioso.
BOOSTER SHOT:
Minister Oduber a referi tambe na e programa di Booster Shot. Manera ta conoci esaki a cuminza cu esnan 60 plus y aworaki cu esnan 40 plus, den orario di 8 or di mainta pa 3 or di atardi, y entrante otro siman lo adapta e horario, cu lo bira di 8’or di mainta pa 8’or di anochi. E vacunacion ta tuma lugar na Centro Deportivo Betico Croes na Santa Cruz, y ta djis yega y “walk in”.
E intencion ta pa e bus cu ta suministra vacuna por aplica entre 200 pa 300 shot pa dia. E bus lo cuminza drenta den diferente bario, cuminzando na San Nicolas Dialuna, y asina bay den diferente bario a stimula mas hende pa tuma e booster shot.
Minister di Salud a menciona cu te cu Diaranzon di e siman aki, 14.316 persona a tuma e booster y gobierno ta keda recomenda y stimula tur hende pa aplica e booster, pasobra simplemente, e vacuna a duna e resultado cu tabata busca den comienzo, y esaki ta proba door di datonan cu hospital ta comparti cu gobierno.
