Barco Hulandes a yuda atrobe pa haci otro captura grandi di droga den Caribe

ORANJESTAD (AAN): E barco di marina Hulandes, Zr.Ms. Holland pa di tres biaha den poco tempo, a sa di intercepta un transporte grandi di droga.

   E barco patruyero haciendo control riba Lama Caribe, a bay controla un boto di piscador, cu abordo tabatin 18 miembro di tripulacion.  Den e boto aki, nan a bin haya 325 kilo di cocaina scondi.

   E droga aki a wordo intercepta riba Diadomingo 20 di Juni, pero apenas Diabierna nan a divulga esaki na prensa.

   Tabata un di e avionnan patruyero di Guardacosta di Caribe Hulandes cu a descubri e boto di piscador aki, cu tin su tras un speedboat tipo Go-Fast mara.  Pa e acto sospechoso aki, nan a core notifica e barco Zr.Ms. Holland, cu mesora a cuminza dirigi su mes na e area.  Tambe a baha na lama dos speedboat potente tipo FRISC, cu abordo un equipo combina di US Coast Guard y Cuerpo di Marina Hulandes.  Tambe e helicopter NH-90 maritimo a lanta vuelo.

   Ora cu esnan abordo di e boto di piscado a nota cu militarnan ta acercando, nan a core los e speedboat Go-Fast for di nan boto.  Y despues nan a cuminza benta un cantidad grandi di contrabanda pafo di e boto di piscado.  Pero tur e accion aki a wordo graba cu videocamera potente.

  Un di e botonan FRISC a bay recoge tur e contrabanda cu a keda drief, for di lama bek.  E boarding team Mericano a bay abordo di e boto di piscado, y a detene tur diesocho persona.  E boto piscado tabata nabega bao bandera Venezolano y tur esnan abordo tin nacionalidad Venezolano.

   Tur e sospechosonan y e contrabando despues a wordo transferi pa un barco di US Coast Guard cu a yega cerca.  Den e accion aki, un total di 325 kilo di droga a wordo confisca.

   DI TRES BIAHA:  Esaki ta e di tres biaha cu e barco Zr. Ms. Holland ta gara droga.  For di Mei 2021 cu nan a cuminza funciona como stationschip den Caribe, nan ta activo pa yuda combati traficacion di droga, y sostene asina Guardacosta di Caribe Hulandes.

   Na comienzo di luna di Juni caba, e barco a logra di intercepta dos transporte di droga.