Fundacion Rancho cu directiva nobo, localidad nobo y hopi proyecto pa desaroya di awo padilanti

ORANJESTAD (AAN) – Clifford Rosa a wordo re-elegi como Presidente di Fundacion Rancho.

Den un entrevista cu DIARIO, señor Rosa a duna di conoce esaki, durante un “soft opening” cu a tuma lugar Diahuebs 1 di Juli aki, den nan localidad nobo.

Clifford Rosa a bisa cu e evento aki ta mustra nos comunidad y nan stakeholders, partnernan y tur otro hende, cu nan tin un localidad nobo, dentro di e actividad Rancho.

E compleho aki, el a splica, a cuminza como un proceso pa crea centro di actividad Rancho y tambe cu un directiva completamente nobo. E siman aki, e proceso pa elegi un directiva diario a transcuri, y tambe poniendo nan vision, y tur locual mester sigui cune.

E anochi aki, Clifford Rosa a expresa, nan a duna un “sabor” di kico tur ta bay sosode den e tempo nan dilanti. “Nos a nace akinan, den e Museo Arkeologico Nacional di Aruba, y awe, 1 di Juli 2021, haciendo un apertura chikito, pa mustra unda nos ta bay ta cu tur e informacionnan cultural, y dunando un artista e oportunidad di haci un exposicion den e localidad aki. Ta trata di Alydia Wever. Y asina por spera hopi cos cu ta bay sosode akinan, den luna di Juli”, Clifford Rosa a señala.

Tabata tin programanan prepara cu a para door di e pandemia, practicamente e fundacion a keda un aña keto, pero si a haci diferente investigacion, a duna capacitacion tambe y nan ta tras di e fondonan tambe, pasobra esey nan a haci tambe door di e directiva: amplia nan conocemento y pone profesionalnan cu tin di haber cu finanzas, pa crea  fondonan pa nan bira mas sostenible, como organizacion, cu tin diez aña haciendo tur cos boluntario, educando nos comunidad tocante Aruba su herencia cultural.

“Aworaki den e spot aki nos ta wak’e un poco mas comercial. Nos ta bay drenta den e area comercial y manera boso sa, nos a inicia tambe cu seguridad di alimento, hoffi di bario, y hopi diferente aspecto, pero tur tin di haber aworaki cu un tiki comercio, pa nos por haya fondonan pa nos ta sostenible, y pa nos por garantiza un futuro pa Fundacion Rancho”, Clifford Rosa a señala.