Super Food Plaza Cares Program ta haci donacion di 100 mil Florin reparti entre tres fundacion local

ORANJESTAD (AAN): Recientemente Super Food Plaza Cares Program a haci entrega di 3 donacion cu a suma un total di 100.000 Florin reparti entre Stichting Casa Cuna Progreso, Fundacion Contra Violencia Relacional y CEDE Aruba.

   Ta gradici clientenan di Super Food Plaza inmensamente pa e sosten, cu apesar di e temponan dificil a sigui haci donacion na SFPCP. Despues di a concentra esfuerzonan pa lunanan largo durante e pandemia pa yuda Fundacion Pa Nos Comunidad y esnan cu tabata depende di e voedselbank, awor a cuminsa yuda tambe otro instancianan back.

   A haci un sondeo di e fundacionan cu ta pasando den momentonan dificil y mira unda e donacion por duna mas resultado pa yuda comunidad. Di e manera aki a dicidi di haci un donacion di 50.000 Florin na Stichting Casa Cuna Progreso pa e por sigui eherce su trabaonan pa nos comunidad.

   No ta un secreto cu durante e pandemia, violencia den famia a crece tambe y esaki ta pone mas presion ariba Fundacion Contra Violencia Relacional (antes Fundacion Pa Hende Muher Den Dificultad) pa atende cu e casonan aki cu ta bin dilanti. E fundacion tin un shelter pa esnan cu pa motibo di violencia mester sali for di nan hogar. E shelter ta den uso constante y ta trece gastonan cu ne, pa cual motibo a haci un donacion di 25.000 Florin na e fundacion aki.

   E di tres organizacion cu a ricibi un donacion for di e Super Food Plaza Cares Program ta CEDE Aruba (Centro pa Desaroyo Aruba). Nan a ricibi e suma di 25.000 Florin pa reparti entre 6 organizacion mas chikito cu ta traha directamente cu muchanan cu ta cai den e grupo di riesgo social den nos comunidad.

   E donacion lo bay na proyectonan mas chikito, pero cu ta yuda directamente pa duna e muchanan aki oportunidadnan cu di otro manera, no lo ta posibel.

Super Food Plaza Cares Program ta gradici e clientenan di Super Food Plaza cu ta participa tur luna y ta haci posibel pa nos por sigui yuda nos comunidad. Bo tambe por yuda y participa pa gana premionan mensual. Pa participa, simplemente haci un donacion di 1,75 Florin of mas na cualkier caha di Super Food Plaza y skirbi bo nomber y number di telefoon patras di bo recibo original. Deposita e recibo den e dropbox di e programa y tur fin di luna ta saca 5 ganador cu ta gana un gift card di Super Food Plaza. Tur donacion ricibi di cliente ta ser otorga pa 100% back na instancianan den nos comunidad y premionan como tambe gastonan di e programa ta ser patrocina pa Super Food Plaza. Fondonan di SFPCP ta ser maneha pa CEDE Aruba.

   Riba e combinacion di foto por mira Señora Renate van Dongen, directora di Stichting Casa Cuna Progreso, cu a ricibi e check for di Sr. Erick Kelly, financial manager di Super Food Plaza. Directora di F.C.V.R., Señora Magaly Maduro, a ricibi e check for di Sr. Johan Klein, store manager di Super Food Plaza. Sr. Bryan Krosendijk, project coordinator di CEDE Aruba, a ricibi e check for di Sr. Rudy Richardson, marketing manager di Super Food Plaza.