ORANJESTAD(AAN): Diabierna y diasabra dia 10 y 11 di maart 2023 lo tuma lugar e di 11 edicion di Aruba Doet! Un iniciativa di CEDE Aruba den cooperacion cu Oranje Fonds,
unda organisacionnan social y boluntarionan ta bini hunto pa haci trabou pa of actividadnan social cu un grupo di interes.
E inicio oficial di Aruba Doet lo tuma lugar diabierna awor na e proyecto di YMCA San Nicolas. Gobernador di Aruba, Alfonso Boekhoudt, lo ta presente pa marca e inicio oficial di Aruba
Doet.
E proyecto di YMCA ta encera embeyeciendo e gang principal di e edificio pa haci'e mas agradabel pa tur e muchanan cu ta frecuenta esaki diariamente.
Hunto cu e proyecto aki, Aruba Doet tin e aña aki un total di 193 proyecto cu mester di 3900 boluntario.
Tin 3400 boluntario cu a registra caba, pero ainda tin mester di 500 boluntario mas pa por realisa tur e proyectonan aki.
Aruba Doet ta invita esnan cu no a registra ainda, pa bishita e website www.arubadoet.com pa mira y registra pa un di 193 proyectonan of pa cualkier di e siguiente proyectonan cu tin un gran necesidad ainda na boluntarionan:
- Grupo Scout Sint Joris
- The Sports Unlimited Foundation
- SV Ind Caravel
- Little League Softball Aruba
- Scout Groep Baden Powell
- Stichting Bethel Nieuw Begin Aruba
- Fundacion Dominicana Arubanse Juan Pablo Duarte
