Barbie di Celia Cruz a wordo lansa y ya a sold-out varios lugar

MIAMI: Como un forma pa corda e postura y elegancia di e dama conoci como ‘Guarachera del Mundo’, e compania di popchi Mattel Toys a saca riba mercado e tan spera Barbie di Celia Cruz, y e ta un edicion limita.

   Nan a lansa esaki e siman aki, den cuadro di Hispanic Heritage Month, y ta wordo bendi pa $35 na Merca.  Tur di nan ya a caba riba website di Barbie, aunke tin hendenan cu ainda a mire na benta riba Amazon y tambe otro bendedornan.

   Mattel a presenta un popchi di Celia hoben, cu un bisti corra (estilo Mermaid) hopi preta di rumbera Cubano, den un tela di satin cu ta culmina cu ruffle tipo ‘bell sleeves’ na e parti mas abao y tambe na e manganan cu toque di glitter di oro, cu un peluca blond cu su cabey lora na halto, un coyar tipo choker rond di su nek, renchi largo di orea, y su famoso zapatonan color di oro.  Su cara tin makeup di lipstick cora y eyeshadow glittery gold.

   E compania a indica den un boletin, cu Celia Cruz tabata e “Reina di Salsa”, y ta un di e mihor artistanan Latino den historia.  El a aparece den varios pelicula tambe, incluyendo “Affair in Havana” di 1957, y “Amorcito Corazon” na 1960.

   Despues di a bandona su isla natal di Cuba y bay Mexico, y despues bay biba na Merca, e carera musical di Celia Cruz a bira grandi desde decada di 1970.

   Prome cu su morto na 2003, Celia a produci 75 album, a gana tres premio Grammys, y a ricibi e President’s National Medal of Arts na 1994.

   Mattel a indica cu Celia Cruz tabata un cantante di hopi genero di musica afrocaribense, y tabatin un presencia energico riba escenario y un estilo unico.  Di berdad e tabata un di e poco muhernan cu tabatin exito den mundo di salsa domina pa hombernan.  Durante mas di mey siglo, el a hiba e titulo di ‘Reina de la Salsa’ cu clase y distincion.

   E popchi tin accesorio cu ta incluyendo un stand pa e popchi keda para riba dje, y un microfon di oro cu por wordo poni den su man.