ORANJESTAD (AAN): Riba Diahuebs, e compania Inter-Assure Insurances a celebra nan di 30 aña di existencia.
E propietario Justus van der Lubbe ta convenci cu su compania ta distingui su mes na prome lugar danki na su personal. Pa e compania di seguro, calidad ta nifica hopi mas cu un bon conocemento di e materia. Mes of mas importante ta un bon atmosfera na oficina.
‘Tur empleado sa kico nan mester haci y con nan mester hacie, y nan sa cu nan ta altamente aprecia,’ el a indica. Pa loke ta cliente tambe semper Inter-Assure a pone calidad dilanti. Un vision importante tabata semper pa no fiha riba volumen pero riba ‘miho cliente’, entre otro famianan hoben cu tin trabao y cu a edifica algo hunto. Hopi biaha esey ta relacionnan solido cu kier seguridad pa nan cas, auto of otro pertenencia y cu ta motiva pa paga un prima pa esey. E crecimento constante di e ultimo tres decadanan aki ta mustra cu e formula di calidad aki a duna fruta.
Inter-Assure a cuminsa na 1993 na Curacao for di un camber di cas di CEO Justus van der Lubbe, despues cu el a gana experiencia na St. Maarten trahando pa e oficina di seguro di su tata, J.P. van der Lubbe. Na 1991 papa Van der Lubbe a bende su oficinanan na Amsterdam, Curaçao, Aruba y St. Maarten. Mey aña despues cu Justus a cuminsa riba su mes for di cas, el a usa e cen di benta di su accionnan den e oficina na St. Maarten pa cumpra un cas modesto den Mercuriusstraat na Curaçao y haci’e un oficina. No obstante tur reto e prome añanan, Inter-Assure a logra haya tur agencia di tur compania di seguro local y algun na Hulanda.
Segun sr. Van der Lubbe e pregunta grandi pa futuro ta si nos ta dispuesto pa bandona actitudnan cu ta ocasiona problemanan exorbitante. Por ehempel, laga cos bay numa y laga e generacion mas hoben carga e conscuencia. Y tambe e papel di victima cu sa cay aden pa huy responsabilidad propio caminda ta cumbini.
‘E tendencia di hustifica cos bisando cu ta door di loke a pasa den pasado, parce un escogencia conciente. Pasobra e ora ey ningun hende no ta ripara cu gobierno ta tene nos chikito y ningun hende no ta sinti su mes yama pa pone man na obra. Sin duda mester registra pasado di un forma cla y completo, y haci esey accesibel pa tur hende. Pero ta dañoso pa sconde tras di esey enbes di crea e condicionnan hunto pa sali for di nos problemanan.
