Bandera Jamaiquino hisa pa prome bes na spiral rotonde dilanti Aeropuerto

Riba Dia di Independencia di Jamaica

ORANJESTAD (AAN): Diaranson atardi, banda di rotonde di aeropuerto, a tuma luga un ceremonia en conexion cu Dia di Independencia di Jamaica. Esaki sigur tabata un momento di gran orguyo pa e comunidad Jamaiquino, Consul Honorario Sr Donald Taylor, Prome Minister mr. Mike Eman, miembronan di Parlamento y invitadonan cu a yega hunto pa presencia pa prome biaha e bandera di e pais bay halto na e rotonde.

   Sr. Chris James, hunto cu e ekipo di CCDN, a organisa e evento special aki den cual diferente orado a hiba palabra. A habri e atardi cu oracion di Pastor Euphema McLean di God’s Faith Pavillion Deliverance Ministries, sigui pa palabra di Consul Honorario di Jamaica Donald Taylor via video. Tambe a hiba palabra Vice-Presidente di Parlamento mr. Muzannin Wever, sigui pa miembro di parlamento Otami Thomasia.

   Prome Minister mr. Mike Eman na su turno tambe a dirigi su mes na tur presente. Inspira pa palabranan for di biografia den buki pa Nelson Mandela, caminda a menciona trayectoria y distancia largo cu mester a cana pa libertad, pa respet, pa reconocemento,  awe ta duna reconocemente na e trayectoria largo cu e comunidad Jamaiquino mester a cana pa logra esaki awe na Aruba.

Cu determinacion a resona e conviccion di Premier Eman, cu e compromiso di e Gobierno aki no ta cu algun pero cu e comunidad den su totalidad, pa sigura cu tur ta gosa di e oportunidadnan di forma igual, ta ricibi ayudo igual y cu e necesidad di e comunidad pa haya oido y ayudo di e gobernacion.

   “E momento cu subi e bandera di Jamaica na e rotonde di aeropuerto, ta momento di reconocemento, respet y di afirmacion cu e comunidad Jamaiquino ta pertenece y ta forma parti di e comunidad di Aruba.

Esaki ta un simbolo cu ta bisa hopi di e compromiso cu tin cu haci na cada ciudadano riba nos isla. E comunidad Jamaiquino a forma parti semper di e sacrificio cu a tuma luga riba nos isla.

  Prome Minister den su discurso a enfatisa riba e importancia di e presencia di e comunidad Jamaiquino riba nos isla, no tin un solo trabou caminda no a mira un Jamaiquino trahando. Nan t’ey den cada trabou, cada lucha, cada sodo cu a forma parti di e lucha pa un miho Aruba. 

   “Ban hisa e bandera na honor di e comunidad Jamaiquino”, ta locual cu Prome Minster Mike Eman a finalisa su discurso cu ne.

   Prome Minister Eman a gradici e comunidad Jamaiquino pa nan trabao inmenso cu nan a haci na bienestar di nos desaroyo y a felicita nan cu e momento hostorico aki di reconocemento.