FPNC falta yuda entre 100 pa 155 mucha cu articulonan di scol

Gabriel Marchena, Trahado Social di Fundacion Pa Nos Comunidad

ORANJESTAD (AAN): Gabriel Marchena, Trahado Social di Fundacion Pa Nos Comunidad a splica den un entrevista cu DIARIO, cu e aña aki nan lo yuda entre 500 pa 550 mucha cu articulonan di scol. Actualmente nan ta buscando mas articulo di scol, manera tas, agenda, calculator, y otro material, pero tambe uniform y jeans den bon condicion,  pa asina nan por yuda aworaki, entre 100 pa 150 mucha.

Aña pasa nan a yuda alrededor di 350 mucha, pero e aña aki FPNC a dicidi di hisa e cantidad di mucha te na 550 mucha. Nan a premira caba cu e cifra por aumenta, pasobra semper tin algun peticion cu ta drenta den ultimo momento, cu nan ta purba di yuda manera cu nan por.

FPNC ta yudando muchanan di scol basico y secundario, pero tin biaha hasta studiantenan di Universidad, EPI, Avond MAVO, kiermen cu por bisa cu nan ta yudando muchanan di tur nivel di scol, cu nan ta purba di yuda segun material cu nan ta ricibi di donacionnan.

FPNC semper ta haci un screening pa check e situacion financiero di e mayornan, cu hopi biaha e entrada no ta yega of no tin un entrada cu por cubri e gastonan di materialnan di scol. Nan ta check e entradanan y cuentanan di e mayornan, pa asina nan por aproba cada peticion cu ta drenta.

Marchena a indica cu nan ta traha cu tur instancia na Aruba, manera Departamento di Asuntonan Social, Wit Gele Kruis, FCCA, Respaldo, cu tambe tin nan trahadonan social y nan ta manda nan lista di muchanan cu mester di articulonan di scol.

El a agrega cu un di e articulonan cu semper ta number un ta tas pa mucha por bay scol, pero tambe e agenda,  schrift, calculator, map, y uniform.  E ta bon pa comunidad sa cu nan ta tuma uniform den bon condicion. Otro cos cu nan ta tuma ta keds den bon estado, nada kibra of mancha, cu un otro mucha por haci bon uzo di dje. Nan team di trahado semper ta percura pa tur articulo ta den bon condicion y nan ta organisa e articulonan prome cu nan haci nan entrega.

Cu aumento di prijs di material pa scol, esaki ta keda un reto pa hopi mayor y pa e fundacion mes.  Pero nan ta kere den generosidad di comunidad di Aruba, como tambe nos comerciantenan cu tin añanan ta yuda nan cu e proyecto aki. Mas cu claro, semper tin espacio pa ricibi mas ayudo y na su luga, nan lo por sigui yuda mas mucha y famianan den necesidad, y sigui aporta na educacion, formacion  y desaroyo di cada mucha. 

Cualkier persona of compania cu kier haci un donacion na fundacion mes, cu ta situa na Modanza 4, of por tuma contacto cu nan na 588 0002 of manda nan un mensahe via nan medionan social. Cualkier donacion via transferencia di banco, mester agrega den e descripcion proyecto Back to School di FPNC. Cada contribucion sigur ta haci un diferencia.