Campaña di Old Skool Bikers cu meta pa yuda dos diferente Lions Club na Aruba

Un Fat Boy Harley unico ta bay wordo rifa

• Na comienso di September tin evento special na Balashi Gardens 

ORANJESTAD (AAN): Durante un conferencia di prensa, e grupo local di coredornan di Harley y motorcycles, esta ‘Old Skool Bikers Club Aruba’ a lanza nan campaña nobo pa sigui cu e meta di duna yudansa na otronan.  Nan ta haci esaki den cuadro di nan programa social cu yama ‘Helping The Helpers’.

   President di Old Skool Bikers Club Aruba, esta John Tromp, a expresa con aña pasa por corda con nan a organiza eventonan grandi pa sostene Women’s Club of Aruba, cu a cristaliza na final cu un rifa grandi na beneficio di e grupo di dama aki y nan programa di ‘Dress a Child’.  Old Skool Bikers Club Arubata un organizacion hoben cu no mas cu un docena di miembro, pero pa e evento di Women’s Club nan a recauda 45 mil Florin.

   Pa 2025 e grupo a dicidi na yuda dos organizacion social local e biaha aki, y a haya refuerzo di dos grupo mas di Bikers.  Ta trata aki di HOG-297 y tambe Shoco Legend, y hunto e tres gruponan aki a uni forza pa yuda dos Service Club importante di Aruba.  Ta trata di Aruba Lions Club, y tambe One Happy Island Lions Club, cu nan proyectonan social.

   Pa por logra esaki, nan lo bay tene un rifa atrobe y e biaha aki prome premio ta un Harley Davidson modelo Fat Boy, cu ta un edicion di 120 aniversario.  Harley a fabrica solamente 3.000 di e Fat Boy aki, y Aruba lo bay rifa esun cu tin serial #45.   E rifa tin como 2ndo premio, 2.000 Florin, y 3er premio tin 1.000 Florin.

   Durante e conferencia di prensa, e grupo a haci entrega di e prome bukinan di rifa na tanto Edmar Lopez (President di Aruba Lions Club), y Junior Arends (President di One Happy Island Lions Club).

   Si bo cumpra rifa di awor caba te cu 6 di September, tin chens pa participa den un tombola yena cu door prize durante nan programa di lanzamento cu lo tuma lugar e dia ey na Balashi Garden.  Bay cu bo ticket of cumpra mas na Balashi Garden, y ricibi un ticket di tombola pa cada ticket di rifa cu bo cumpra.  E anochi ey lo tin animacion musical di ‘N Fuzion, grupo Skale, y DJ Jeff pa anima publico.

   Presente na e conferencia di prensa tabatin tambe Hilda, representante di Shoco Legend.  Varios miembro di tanto e Bikernan y tambe e clubnan di Lions tambe tabata presente.  Nan ta spera cu comunidad duna nan un sosten pa nan sigui yuda e clubnan social di Aruba.