Bandera di Aruba a zwaai na Tokyo durante ceremonia apertura weganan Paralympico

Elliott Loonstra su soño a bira realidad

ORANJESTAD (AAN):   Riba potret por aprecia e Atleta Paralympico arubiano Elliott Loonstra cu e bandera di Aruba diamars durante e ceremonia di Apertura di e Weganan Paralympico di Tokyo 2020.

Mester menciona cu esaki tabata e soño di Elliott di por a participa un dia den e weganan paralympico. Awe su soño a bira un realidad.

E weganan Paralympico lo tuma lugar di dia 24 di Augustus te cu dia 5 di September na Tokyo. Elliott Loonstra, lo representa Aruba den e categoria di Para-Taekwondo.

Elliott ta un hoben cu pesar di su handicap (a nace sin un parti di su man drechi), nunca el stop di lucha pa logra su metanan den bida hunto cu e sosten di su mayornan y su coach Luciano Mazzeo.

DIARIO ta desea Elliott hopi exito cu su participacion na Tokyo.

Potret cortesia Facebook Eliott Loonstra.